Suizidioa prebenitzeko eta familiei babesa emateko hitzaldia, asteazkenean
Iratxe Etxenike psikologoak eskainiko du saioa. Agifes erakundeko profesionala izateaz gain, Biziraun elkarteko kidea da ere, eta elkar laguntzako taldeak koordinatzen ditu bertan.
Iratxe Etxenike psikologoak suizidioa prebenitzeko eta familiei babesa emateko hitzaldia eskainiko du Hondarribian. Laguntza sareak sortzearen garrantziaz arituko da, zehazki. Etxenike Agifes erakundeko profesionala izateaz gain, Biziraun elkarteko kidea da (suizidioak mindutako pertsonen elkartea), eta elkar laguntzako taldeak koordinatzen ditu bertan.
Haren esanetan suizidioaren inguruan esku hartzeko beharra handia dago alor guztietan: prebentzioan, interbentzioan eta posbentzioan; “izan ere, jendeak ez daki nora jo, instituzioek ez dute gai hau osotasunean jorratzen, eta askotan, zuzenean bideratzen dute jendea Biziraunera. Gure alorra posbentzioa da eta baliabide gabezia dago”.
Askok uste dutenaren kontrara, gainera, suizidio kasuak ez direla soilik familia desegituratuetan gertatzen aditzera eman nahi du ere, eta edonori gerta dakiokeela. Horregatik, seinaleei adi egotearen garrantzia nabarmendu du adituak, eta sufritzen ari denari babesa eskaintzeko gakoak benetako denbora eskaintzea eta ingurune segurua sortzea direla adierazi du. “Ez dago hitz magikorik, baina entzuteak eta ondoan egoteak laguntzen du”.
Hitzaldia hilaren 24an izango da, Kultur Etxean, 18:00etan.
Kazetaritza sariak
Beste urte batez Kazetaritza eta Buru Osasuna sariak antolatu ditu Agifes erakundeak. Buru osasunaren inguruko kazetaritza eta dibulgazio lanak sustatzea eta saritzea da sariketaren helburua, aurten bereziki, buru nahasmendua duten pertsonei buruzko informazioa ikuspegi arduratsu batetik ematen duten lanengan ezarri dute fokua. Sari horiek hedabideetako profesionalei eskerrak emateko sortu zituztela adierazi dute, “ahalmen handia baitute buru osasuneko arazoak naturalizatzeko eta pertsonen gizarteratzea bultzatzeko”.
