Iker Cortesek emakumeen traineruko entrenatzaile izateari utziko dio
2025-2026 denboraldirako entrenatzaile berria izango du Hondarribia Arraun Elkarteko emakumeen ontziak. Cortesek zortzi urte egin ditu taldean. Haren onena eman izanaren lasaitasunarekin, "harro" esan dio agur taldeari.
Hondarribia Arraun Elkarteak jakinarazi duenez Iker Cortes entrenatzaileak ez du emakumeen ontziaren gidari lanetan jarraituko. Cortes sestaoarra emakumezkoen traineruaren arduradun tekniko nagusi izan da zortzi urtez. Datorren denboraldirako, ordea, aldaketa iragarri du Hondarribia arraun elkarteak, “aldaketa baten unea” dela iritzita.
Elkarteak esker oneko hitzak besterik ez ditu izan Cortesentzat, “egindako lan nekezagatik eta elkartea osatzen dugun guztiokin izandako jarrera bikainagatik. Beti izango zara guretako bat. Mila esker, Iker!” esan dute.
Cortesek berak, erabakia “errespetuz” onartu duela adierazi du sare sozialetan eta “nire onena eman izanaren lasaitasunarekin eta istorio honen parte izatearen harrotasunarekin” doala gaineratu du. Bestalde, arraunlari, teknikari, zuzendaritza taldeko kide eta zaleei eskerrak eman eta klubari “hazten eta arrakastak lortzen” jarraitzea desiratu dio.
Cortes 2018-2019 denboraldian heldu zen elkartera eta haren gidaritzapean Hondarribia Bertako Igogailuak emakumeen maila nagusian [Eusko Tren Ligan] aritu da zazpi urtez. Urte horietan zehar play offa galdu izanagatik behin jaitsi ziren ETE Ligara, 2021 urtean [2018an ere ETE Ligan aritzekoak ziren, baina Bateleren desagerpenarekin goren mailan geratu ziren] izan zen hori. Urtebeteren ondoren, ordea, goren mailara itzultzea lortu zuten ETE Liga aise irabaziz.
Aurtengo denboraldian 8. postuan amaitu dute eta beraz, datorren denboraldian ETE Ligara itzuliko da ontzi berdea. Hori bai, laster batean Eusko Tren Ligara itzultzeko promesarekin.
