Mugikortasunaren kontzientziazioan arituko da Hondarribia
Europako Mugikortasun astearen harira, hainbat ekimen antolatu ditu udalak herriko eragileekin batera. Autoak ez erabiltzearen aldeko kontzientziazioa du helburu egitasmoak.
Estitxu Urtizberea, Balazta elkarteko eta Egiluze ikastetxeko bi kiderekin batera. Irailaren 16tik 22ra egingo dute Europako Mugikortasun astea, eta Hondarribira ere iritsiko da. Autoa ez erabiltzearen aldeko astea da, hark dituen desabantailak aurkeztuz, eta oinez ibiltzeak dituen abantailak erakutsiz. Herriko hainbat eragilerekin elkarlanean, aste osoko programazioa antolatu du Hondarribiko Udalak. Iaz, Balazta Bidasoaldeko Bizikletaren Aldeko elkartearekin batera hiru eguneko programazioa egin zuten. Aurten, handitzeko apustua egin dute.
Adin guztiei zuzendutako ekimenak antolatu dituzte, eta udalak haien bizilagunei hurbiltzeko proposamena egin die. “Mugikortasun Astea ez da soilik egitarau bat; gure kaleak, gure osasuna eta gure etorkizuna hobetzeko hiri oso baten borondatea da. Guztion artean Hondarribia hobeago eta seguruago bat eraikitzen jarraitu nahi dugu”, esan du Estitxu Urtizberea udaleko zinegotziak.
Bizikletak ez du adinik. Hori bera aldarrikatzen du udalak Balaztarekin batera Nagusikleta ekimenarekin urtean zehar. Mugikortasun astearen lehen bi egunetan (16 eta 17) adineko egoitzetako jendea bizikletan aterako dute kalera. 18an mahai ingurua egingo dute Itsas Etxea auditoriumean, 18:30ean. Sobre ruedas dokumentala proiektatuko dute lehen, eta ondoren, mugikortasuna oinarri hartuz egingo dute mahai ingurua.
Ostiral goizean, Egiluze ikastetxeak lekukoa hartuko du. Errespetatu eskolarako sarrera! ekimena egingo dute. Ikastetxeko lehen hezkuntzako 4. mailako ikasleak eskola kanpoan elkartuko dira. Europako Mugikortasun asteak kontzientziatzea du helburu, eta hori bera lortu nahi dute, erakutsiz autoek zer nolako arriskuak eragin ditzaketen eskola inguruetan. Emeki elkarteak bere aletxoa gehitu nahi izan du programaziora. Larunbatean, haien egoitzatik ibilaldi bat hasiko dute. Ibilaldia solasaldiarekin uztartuko dute, eta espazio publikoaren inguruan dituzten pertzepzioak partekatuko dituzte bertaratutakoen artean. Ibilaldia irisgarria izango da, eta 11:00etan hasiko da.
Larunbatean ere, 18:00etan, Balazta elkarteko kideek bizikletak konponduko dituzte San Pedro kalean. Bertaratutakoek haien bizikletak eraman, eta bertan, denen artean, arazoei konponbideak aurkitzen arituko dira.
Azken egunean, jai
Iaz, mugikortasunaren astearen harira, Mendeluko errepidea itxi zuten, eta bertan hainbat ekimen egin zituzten. Aurten, berdin jokatuko dute. Igandean, 11:00etatik 14;00etara, Mendeluko errepidea itxi eta bertan festa giroa gailenduko da. Zuzeneko musika, aurpegi margoketa, puzgarriak… adin guztiek edukiko dute disfrutatzeko aukera. Paella herrikoia ere egingo dute. Jendea bertara hurbiltzeko, 11:00etan Gernikako Arbolan jarri dute hitzordua, bizikletan denak batera mugitzeko.
Azkenik, 22an, autorik gabeko nazioarteko eguna ospatuko dute. Egiluze ikastetxeko lehen hezkuntzako 6. mailako eta DBH 1eko ikasleek eskolaren aurrean horma irudi bat marraztuko dute.
