Eguzkik salatu du Plaiaundiko kirol instalazioak lekualdatu gabe daudela oraindik
Talde ekologistak esan duenaren arabera, duela 30 urte lekualdatuta egon behar lukete instalazioek ezarritako arau eskakizunak betetzeko.
Eguzki talde ekologistak, ohar baten bidez, salatu du Plaiaundiko kirol instalazioak lekualdatu gabe daudela.
“Gogoratu behar dugu duela 30 urte Plaiaundiko parketik kanpo lekualdatuta egon beharko liratekeela ezarritako arau eskakizunak betetzeko eta, ondorioz, bi hektareako eremu horretan estuarioko ekosistema lehengoratzeko, Plan eta araudi hauen arabera: Eusko Jaurlaritzak, Gipuzkoako Foru Aldundiak eta Irun eta Hondarribiko udalek 1994an sinatutako Txingudi Babesteko eta Antolatzeko Plan Berezia eta Txingudiko naturagunea Natura 2000 Sareko babes figuren pean kudeatzeko 2013ko araudia, figura horiek Hegaztientzako Babes Bereziko Eremua eta Kontserbazio Bereziko Eremua izanik”.
Era berean, gehitu dute Irungo Udalak nahiago duela zilegi izan daitekeen estrategia politiko bati erantzuten dion asmo handiko proiektu bat bultzatu, nahitaez bete beharreko Europako araudia eta onartutako plan autonomikoa “behingoz” betetzea baino.
Azkenik, utzikeria alde batera uzteko deia egin dute, eta gaiari “serioski” heldu behar zaiola gaineratu dute araudia eta plan berezia “behingoz” bultzatzeko, kirol instalazioak Txenpereneara lekualdatuz eta, ondorioz, 2023ko osoko bilkuraren akordioa bete.
