Marea biziei erantzuteko zenbait prebentzio neurri hartu dituzte
Atzo eta gaurko eguraldiaren iragarpena ikusita, prebentzio neurriak aktibatu dituzte Bidasoa ibaiak gainezka egiten badu.
Atzo eta gaurko iragarritako eguraldiari so, marea biziei erantzuteko abian jarritako neurrien inguruko informazioa emateko agerraldia egin dute Cristina Laborda Irungo alkateak eta Iñigo Berges Segurtasuneko eta Herritarren Bizikidetzako ordezkariak. Bidasoa ibaiak gainezka egin ez duen arren, jakinarazi dute dispositiboa “prebentiboki” aktibatu dutela.
Laborda: “Urteak pasa ahala neurriak hobetuz joan gara, Babes Zibilak egiten duen lan handiaz gain, ibaiak gainezka egiten badu, ahalik eta ondoen prestatuta egon dadin. Behobian hartutako neurrien eraginkortasuna ikusita, Santiagoko beste zona honetarako ainguratze eta uhate sisteman ere inbertitu dugu, baita beste jarduketa batzuetan ere, hala nola, bidegorriko parterretan kota igotzea urak inguruko etxebizitzen etxabeetan eraginik izan ez dezan”.
Irungo Udalak protokolo berezi bat dauka Babes Zibileko Udal Planaren barruan uholdeei eta marea biziei aurre egiteko Santiagoko bidegorriaren eremuan eta Behobian. Urtero, marea taulak argitaratzen dituztenean, aurreikusitako mareen altuerak berrikusten dituzte jarraipen berezia zein egunetan egin behar den ebazteko.
Santiagon eta Behobian marea biziak edota uholdeak daudenean, urei eusteko eta husteko konportak erabiltzen dituzte. Hots, xukatzeko ponpa mugikorrak ere erabiltzen dituzte ur asko pilatzen denerako. Monitorizatzeko eta iragartzeko sistemak ere erabiltzen dituzte horrelakoetan.
