'Hau ez da hileta paltsu bat' erakusketa, Moskuko etxe batean
Ramon Zabalegi eta Nagore Legarretaren lanekin beteko dute Korrokoitz 13 zenbakiko etxea. "Aitormen, omenaldi eta maitasun" ekitaldi bat izango da.
Hilaren 27an Hau ez da hileta paltsu bat erakusketa inauguratuko dute Ramon Zabalegi eta Nagore Legarretak. Korrokoitz 13 zenbakian, Moskun, izango da berau, zehazki, Joxepa Anttoni Garaño Etxeberria birramonak eta Inocencio Aranburu Arietaraunabeña birraitonak eraikitako etxeak jasoko du erakusketa.
“Eraistearen mehatxua auzoko etxe zaharrenen gainean dago jada. Sustatzaileek eta udalak ahalik eta etekin handiena bilatzen dute, gutxieneko konpentsazioekin, komunitatea espoliatuz eta memoria ezabatuz”, zehaztu dute Zabalegi zein Legarretak. Egoera horren aurrean, hortaz, bizia eta artea aldarrikatu nahi dituzte, bai eta aitormen, omenaldi eta maitasun ekitaldi bat ospatu ere.
Korrokoitzeko etxeko gela guztiak Zabalegi eta Legarretaren lanekin beteko dituzte, eta zehaztu dutenaren arabera paretetan gorputzak, zauriak eta zaurgarritasuna solastuko dira argazki estenopeikoaren, grabatuaren, collagearen eta hainbat materialen bidez. Gainera, euren lagunen musika entzuteko aukera izango dela aurreratu dute.
“Omenaldi bat Mosku, Ama Xantalen eta gure auzo eta etxe izan denari. Leku honen memoria, balioa eta energia partekatzeko aukera ederra, desagertu aurretik”, amaitu dute.
Larunbat arratsaldeko bostetan emango diote hasiera ekitaldiari Axi Bukosen pintxadarekin, eta ondoren Inoren ero ni taldearen kontzertua izango da. Ekitaldiari amaiera dj sorta batekin emango diote.
