Igor Enparan: "Bi urte daramatzagu elkarrizketaren bitartez gatazka honi amaiera emateko saiakeran, eta ez dugu etsiko"
Konponbideari begira esperantzatsu agertu da alkatea. Aurten "herritarren urtea" izaten ari dela adierazi du eta konponbidearen alde "keinu txikiak" egon direla: "Hondarribiarrek erakutsi dute herria bizirik dagoela eta Hondarribiak gatazka bat duen arren konponbiderako ere prest dagoela".
Jaizkibel konpainiaren zein HAOSEren desfileak bukatu ondoren egin ditu adierazpenak Igor Enparan alkateak. Goizean zehar herrian izandako giroa “errespetuzkoa” izan dela adierazi du, eta eragile bakoitzak “Hondarribiko Alardea bizitu” eta herrian aspaldi gertatutakoa “bakoitzak bere erara gogoratzeko aukera” eduki duela gaineratu du.
Aldi berean, Jaizkibel konpainiarengandik jasotako gutuna lasai irakurtzeko tarterik izan ez duen arren, laburbilduz eta ikusi ahal izan duenaren arabera, gatazka konpontzeko ahaleginetan jarraitzeko eskaera egin diotela adierazi du. Horri erantzunez, alkateak gatazka horri amaiera emateko saiakeran bi urte daramaten honetan ez dutela etsiko esan du irmo. “Saiatuko gara behin eta berriro gauzak konpontzen elkarrizketaren bitartez. Aurten herritarren urtea izatea nahi genuen, eta uste dut herritarrek erantzun dutela. Keinuen urtetik administrazioaren urtera pasatu ginen. Administrazioan urratsak egin ziren eta aurten herritarren urtea zen honetan, uste dut bai atzo eta baita gaur ere hondarribiarrek erakutsi dutela herria bizirik dagoela, eta Hondarribiak gatazka bat duen arren, konponbiderako ere prest dagoela. Esango nuke gogoa ere badagoela gauzak mugitzeko eta konponbide bat bilatzen saiatzeko”.
Azkenik, gaur goizean HAOSEri dagokion Gernikako Arbolako belardi zatia ia hutsik ikusi ahal izan den arren, alarde baztertzaileko kantinerak, kapitainak eta banderak eramaten dituztenak gerturatu direnaren informazioa jaso du alkateak, eta beraz, dekretua “erdizka betetzeko saiakera” egin dutela nabarmendu du. Horregatik, dekretuan jasotakoa guztiz bete ez duten arren, “aurreko eguneko tentsio egoerak kontuan izanik”, gaur goizekoa “keinu” bat izan dela iritzi du.
“Nik dudan informazioaren arabera erdizka betetzeko saiakera egin dute, nahiz eta ez duten guztiz bete. Baina aurreko egunetako tentsio egoerak kontuan edukita, uste dut gaurkoa keinu bat izan dela, eta nahiz eta denak ez diren elkartu, elkartzeko saiakera bat egon dela. Horrela jaso dut. Urrats txikiak diren arren, herri bat gara eta herri bezala jaiak ospatzera deituta gaude. Guztiok ditugu dekretuan jasotzen diren betebeharrak. Horrek segurtasunari eta ordena publikoari erantzuten baitio. Datozen egunetan iritsiko dira Udaltzaingoaren zein Ertzaintzaren txostenak, eta balorazio bat egiteko beharko ditugu informe horiek guztiak”.
