Aurten ere Jaizkibel bakartu nahi izan dute
Alardearen eguneko dekretua erabat bete du Jaizkibel konpainiak. Gernikako Arbolan ez dira izan konpainia baztertzaileetako kideak.
Jaizkibel konpainiak, iaz bezala, bere egin du Gernikako Arbola. Alarde Eguneko desfilea hasi aurretik Gernikako Arbolan ziren biltzekoak konpainia guztiak, hala zegoen adierazita joan den astean Hondarribiko Udalak egin eta kaleratutako ebazpenean, epaitegiek berretsi zutena. Ebazpen hori bete duen bakarra Jaizkibel izan da. 07:45ean biltzen hasi dira, ebazpen horrek ezarritako ordutegia jarraiki, konpainia parekidekoak zabalgunean; beste konpainien partetik kantineraren bat, kapitain batzuk eta banderak eramaten dituztenetako hainbat Gernikako Arbola inguruan izan dira, albo batean eta Jaizkibeldik urrun; beste konpainiakideen arrastorik ez, nahiz eta 07:00-07:55 tartean izan agertzeko haien ordua, udal dekretuaren arabera. Beraz, gaurko landutako ebazpena ez dute bete konpainia baztertzaileek, iaz bezala. Jaizkibel bakartu nahi izan dute emakumeak soldadu bezala onartzen ez dituzten konpainiek, nahiz eta haien ordezkariren bat izan abiapuntuan. Konpainia ez parekideen ordezkariren bat ere izan da Gernikako Arbolan Jaizkibeli harrera egiten.
Euripean iritsi dira Jaizkibelekoak euren bilgunera. Eguraldi kaskarra gaur Hondarribiko festetako egun handienean. Zintzo asko heldu diote herriko festaz gozatzeko eta gozarazteko zereginari. Palestinako zapiekin aurten, elkartasun keinu oso esanguratsua. Konpainia oso handia da Jaizkibel, urtetik urtera zabalagoa. 29. aldia du aurtengoa festak denenak eta denentzat direla adierazten, non eta herriko etxe guztietako egutegietan gorriz seinalatuta dagoen egunean, Alardean.
Ordutegia zorrotz beteta hasi du bidea Jaizkibelek. Gernikako Arbola utzi, eta Kale Nagusirako bideari ekin diot. Abiapuntuan zaleak eta jarraitzaileak alboan izan ditu konpainiak. Kale Nagusian, Arma Plazarako bidean are gehiago izan dira konpainia babesten izan direnak, aldeko oihu eta animo mezu artean.
Nora Ferreira Jaizkibelen kapitainak lehen adierazpenak egin ditu Gernikako Arbolan. Adierazi du udalaren ebazpenarekin ados izan ez arren, bete dutela. “Alarde matxistako kideak ez dira agertu. Garbi dugu dekretua beteko dugula nahioz eta horrekin ados ez izan. Gaurkoaren aurretik gehiago egin zitekeela uste dugu. Ondo pasako dugu, ziur. Argi dago badagoela jendea festak behar bezala aurrera egin dezan borondaterik ez duela. Ordutegiak eta tradizioa, hainbeste gustuko duten hori, ez dituzte bete nahi gure ondoan izan nahi ez dutelako. Denak espazio berberean egotekoa arazorik ez dugu guk”.
Jarraian, hasierako une horien argazki sorta eta bideoa.
