Behin betiko erabakia hartu bitartean dekretuak bere horretan jarraitu behar duela ebatzi du epaileak
Gernikako Arbolan esleitutako espazioak eta ordutegiak "zorrotz" betetzeko eskatu du Igor Enparan alkateak, eta gogorarazi du jaiak "gozatzeko eta ondo pasatzeko" direla.
Helegitearen ebazpenari buruzko xehetasunak eman ditu alkateak gaur goizean. Gaur goizean Hondarribiko alkateak gobernukideak alboan zituelarik, HAOSEk (Hondarribiko Alardearen Ondarea Sustatzeko Elkarteak) ezarritako helegiteari buruzko epailearen ebazpenaren berri eman eta egoerari buruzko gogoeta plazaratu du. Helegiteak, zehazki, elkar formatzeko ordutegiari eragiten dio.
Alkateak azaldu duenez, Donostiako Administrazioarekiko auzien 3. epaileak behin betiko erabakia hartu bitartean dekretuak bere horretan jarraitu behar duela ebatzi du. Hau da, HAOSEk eskatutako neurri “kautelarisimoa” atzera bota du epaileak. Beraz, jaiak iraun bitartean dekretua “onartu eta errespetatu” behar izango dela adierazi du Enparanek.
Hori horrela, konpainia guztiek honako ordutegi hauek errespetatu beharko dituzte hilaren 8an: HAOSEko Konpainiak 07:00etatik 07:55era elkartuko dira Gernikako Arbolan. Hondarribiko Alardeko Jaizkibel Konpainia, aldiz, 07:45ean batuko da Gernikako Arbolara. Jaizkibel Konpainiak 08:00etan hasiko du martxa eta Kale Nagusitik Arma Plazarantz egingo du bidea. Ondoren, 08:45etarako Harresilanda kalea libre utzi eta Sainduara abiatuko dira. HAOSEk 08:55ean ekingo dio desfileari.
Alkateak “positiboki” ikusi du HAOSEk auzia epaitegira eraman izana, haren ustez erabaki horrek “legeak eta arauak onartzeko eta errespetatzeko borondatea dagoela” esan nahi baitu. Zentzu horretan, Gernikako Arbolan esleitutako espazioak eta ordutegiak “zorrotz” bete behar direla adierazi eta HAOSEko arduradunei epaileak babestu duen agindua betetzeko eskatu die. Herritarrei, berriz, “zibismoz eta tolerantziaz” jokatzeko eskatu die, herritarren arteko “tentsiorik” sor ez dadin. “Hondarribiar guztiei eskatzen diegu bakoitzak bere ahalegina egin dezala jaiak errespetuz eta elkarbizitzan ospatzeko. Jaiak horretarako dira: gozatzeko eta ondo pasatzeko”, gogorarazi du.
Azkenik, Eusko Jaurlaritzako lehendakariari, Gipuzkoako Ahaldun Nagusiari eta alderdi politiko guztiei ere zuzendu zaie alkatea, eta horiei Hondarribiko Alardean “oinarrizko eskubide guztiak errespetatzeko arazoak lehen pertsonan modu serio eta zuzenean konpontzen lagun dezatela” eskatu die.
