Hondarribia, Kontxan!
Hondarribiko emakumeen trainerua Kontxan izango da. Ohorez lortu dute urteko estropada handienean izateko aukera.
Hondarribiko arraunlariak, sailkapenaren ospakizun betean.Hondarribia Arraun Elkartea Ez dute hutsik egin. Agian, Euskotren Ligan falta izan duten amorrua atera dute gaurkoan. Akaso, itsasoa alde izan dute. Agian, ligatik jaisteak gogortu egin ditu, eta malkoak irribarre bihurtu nahi izan dituzte. Beharbada, Miren Garmendia patroiak esan bezala, Guadalupeko Amaren laguntza izan dute. Baina ziur esan daitekeena da sekulako maila eman duela gaurkoan Kontxako sailkapen estropadan emakumeen Hondarribiaren ontziak, eta 2019tik jarraian egin bezala, Kontxan izango da Ama Guadalupekoa. Bosgarren izan dira gaurko sailkapen estropadan. Zazpi plaza zeuden jokoan gaurkoan, eta horietako bat Hondarribiarentzat izan da. Beheko zerrendan, gaurko estropadaren lehen postuen zerrenda.
Ziabogan jada ikusi da berdeak ez direla Kontxara joan denbora-pasan. Zauria zuten, ligatik jaistea drama handiegirik gabe eraman badute ere, minduta daude arraunlariak. Nolabait zauri hori itxi, edo behintzat ixteko saiakeran izan dira gaurko sailkapen estropadan, eta baita lortu ere. Hilaren 7an eta 14an emakumeen munduko traineru onenekin batera izango dira lehian hondarribiarrak. Merezitako sailkapena lortu dute. Goza dezatela arraunaz eta Kontxaz herriko emakume horiek, merezi dutelako. 2026koak, 2026rako.
- 1. Orio 11.42
- 2. Tolosaldea 11.49
- 3. Donostiarra 11.53
- 4. Hibaika 11.59
- 5. Hondarribia 12.02
- 6. Astillero 12.04
- 7. Zumaia 12.05
- 8. San Juan 12.09
- 9. Zarautz. 12:00eko denbora egin du, baina epaileek 10 segundo zigorra ezarri diote hasierako estatxa behar baino lehenago askatzeagatik. Beraz, 12:10eko denbora da haiena.
