Hilaren 10ean hasiko dira partaidetza bidezko aurrekontuen prozesuak
1,5 milioi euro jarriko dituzte; 1,3 milioi euroren erabilera prozesu orokorraren bidez erabakiko dute. Gainontzekoa, 16 eta 30 urte arteko gazteen prozesuaren bidez.
Jon Ugarte Irungo Udaleko Gobernu Irekirako eta Herritarren Arretarako ordezkariak iragarri duenez, hilaren 10ean hasiko da Irungo partaidetza bidezko aurrekontuak egiteko prozesua. Beste edizio batzuetan bezala, udalaren aurrekontuko 1,5 milioi euro jarriko dituzte herritarren eskura; 1,3 milioi euroren erabilera prozesu orokorraren bidez erabakiko dute, eta beste 200.000 eurorena 16 eta 30 urte arteko gazteentzako prozesuaren bidez.
Prozesu orokor horretan 16 urtetik gorako bizilagunek har dezakete parte; aldiz, Irungo gazteentzako prozesu espezifikoan, 16 eta 30 urte artekoek. Prozesu horietan parte hartzeko bi modu daude:
- Udalaren webgunea. Herritarrek udalaren webgunearen bidez egin ditzakete proposamenak, eta bildutakoen artean aurretiko online bozketa bat egingo dute. Horietatik hamahiru aukeratuko dituzte. Proposamenak online aurkezteko epea hilaren 11tik 15era izango da.
- Aurrez aurrezko bilera. Bileran hiru proposamen aukeratuko dituzte azken bozketan sartzeko. Hilaren 10ean izango da bilera, Palmera Montero Gunean, 19:00etan.
Hots, prozesu orokorraren barruan, beste lau proposamen sartuko dituzte azken bozketan: auzo elkarteen federazioaren hiru eta Hiritar Foroaren bat.
Gazteentzako prozesuaren barruan, aldiz, proposamenak online bakarrik egingo dira, eta beste lau proposamen sartuko dira bozketan: Eskola Agenda 2030 ekimeneko bi, Gazteria Zerbitzuaren bat eta IrunBixi foroaren beste bat.
Berritasun modura, karpak
Orotara, prozesu bakoitzeko hogei proiektu aukeratuko dituzte bi bideetatik, eta behin zerbitzu teknikoek horiek baloratzen dituztenean eta proiektuen zerrenda osatzen dutenean, udalaren webgunean jarriko dute zerrenda ikusgai herritarrek aurrekontu orokorraren barruan zein proposamen sartuko diren bozkatu dezaten.
Azken fasera iristen diren proposamenak bozkatzeko epea urriaren 3tik 7ra izango da, eta elektronikoki bozkatzeko aukera izango da Irun txartela erabiliz.
Aurtengo prozesuetan bada berrikuntza bat, eta herritarrek parte hartzeko karpak dira horiek. Bi karpa jarriko dituzte; bata informazio karpa izango da, eta online bozketa sustatzekoa izango da bestea. Informazioaren karpa hilaren 9an (asteartea) instalatuko dute, 18:00etatik 20:00etara, Palmera Montero gunearen kanpoaldean. Online bozketarena, haatik, urriaren 3an, ordu berean, Zabaltza plazan.
