Zesta punta partidak azken fasean sartuko dira ostiralean
Emakumeen Master Serieseko finalaurreko partida eta gizonezkoen Grand Slameko ligaxkako azken partidak jokatuko dira Jostaldi pilotalekuan.
Argazkia: Jai Alive. Ostiral honetan emakumeen Master Serieseko finalerdiak jokatuko dira Hondarribiko Jostaldi pilotalekuan. Erika-Gisela bikotea Naroa-Alizeren kontra lehiatuko da. Partida honetako bikote irabazlea Lur eta Lauraren kontra arituko da irailaren 19an jokatuko den finalean.
Ondoren, gizonezkoen txanda izango da. Grand Slameko ligaxkako azken partida izango da ostiral honetakoa. Bixente-Atain bikoteak Txanika-Salegi izango du aurkari. Antolatzaileek partida oso irekia izango dela aurreratu dute. Bikote irabazlea B multzoko bigarren sailkatua izango da, eta beraz, garaipena lortzen duenak soilik egingo du aurrera.
Oier Kanpandegi hondarribiarra dagoeneko sailkatuta dago finalerdietarako [Erik Mendizabal bikotekidearekin], eta beraz, Julen ‘Txanika’ Basterrak garaipena eskuratuko bali, bi hondarribiar arituko lirateke finalerdietan.
Orain arteko emaitzei dagokienez, Arbe-Argoitia, Erik-Kanpan eta Hormaetxea-Bailo sailkatu dira finalerdietarako. Lehen bikoteak 7 puntu dauzka, bigarrenak 5 puntu eta azkenak 8 puntu.
Sarrerak lotura honetan eskura daitezke jada. 20:00etan hasiko dira partidak.
