Aranibar eta Katea auzoaren artean behin-behineko pasabidea jarri dute
Andrearriaga kalean behin-behineko pasabide bat eraiki dute, eta irailaren 1etik aurrera egongo da erabilgarri.
Adif hirugarren hariaren azpiegitura eraikitzeko lanak egiten ari da Irunen; obra horrek Abiadura Handiko Trenaren (AHT) iritsiera “erraztuko” du. Ildo horretatik, Cristina Laborda Irungo alkateak jakinarazi du Katea auzoaren berrurbanizazio lanekin aurrera jarraitzen dutela, eta irailaren 1ean Telleria eta Aranibar ingurua lotzen dituen zubia itxiko dutela obren ondorioz.
Era berean, azpimarratu dute zubiaren itxiera “beharrezkoa” dela Adifen obrekin jarraitzeko, AHTarentzat trenbidearen gainean dauden zubien galibo altuera igo behar baita.
Telleria zubia Aranibar eta Katea auzoaren arteko lotura nagusia izanik, behin-behineko eskailera batzuk eraiki dituzte Andrearriaga kalean. Irailaren 1ean, obrekin hasten diren egunean bertan izango dira erabilgarri eskailera horiek.
Adifen datuen arabera, Telleria zubiaren ordez eraikiko duten egitura bost hilabeteko epean amaitzea aurreikusten dutela azaldu du Labordak.
