Amua Bideoklip Lehiaketan izena emateko epea zabaldu dute
Iaz I. Bideoklip Lehiaketak "sekulako arrakasta" izan ondoren, aurten Euskal Herri osora zabaltzea erabaki dute antolatzaileek.
2025eko azaroaren 13, 14 eta 15ean jasoko du Itsas Etxea Auditoriumak Amua Film Labur Musikalen Jaialdia. Amua Kultur elkarteak eta Hondarribiko Udalak elkarlanean antolatzen duten jaialdia da eta bosgarren ekitaldia izango da aurtengoa.
Jaialdiaren baitan hainbat lehiaketa antolatzen dituzte, eta dagoeneko II. Bideoklip Lehiaketan parte hartzeko izen ematea zabalik dagoela iragarri dute antolatzaileek.
Inguruko artisten lana balioan jartzeko sortu zuten iaz bideoklip lehiaketa. Sekulako arrakasta izan zuen proposamenak, eta aurten Euskal Herri osora zabaltzea erabaki dute, euskaraz jarduten duten musika taldeen lana balioan jartzeko asmoz.
Antolatzaileen ustez lanak euskaraz plazaratzen dituzten taldeak dira euskara sustatzeko eta euskaraz gozatzeko oinarri sendoenetako bat, eta gaur egun euskarazko musika eta komunitatea defendatzea eta sustatzea “inoiz baino beharrezkoagoa” dela uste dute.
Beraz, Gipuzkoako, Bizkaiako, Arabako, Nafarroako, Lapurdiko, Behe Nafarroko eta Zuberoako taldeek izango dute lehiaketan parte hartzeko aukera, “beti ere aurkeztutako lanak osorik euskaraz badira”, zehaztu dute antolatzaileek.
Lanak urriaren 10era bitarte aurkeztu daitezke. Horiek jaialdiko epaimahaiak jasoko ditu, zeina musikan, zineman eta publizitatean adituan diren zenbait profesionalek osatuko duten. Hautatutako hamar finalistak jaialdiaren programazioaren baitan proiektatuko dituzte.
Antolatzaileek aurreratu dutenez lehen sariak izango du soilik balorazio ekonomikoa. Talde irabazleak 1.000 euroko saria jasoko du (sari horri dagokion PFGZ kenduko zaio), eta azaroaren 15ean egingo den itxiera ekitaldian zuzenean jotzeko aukera izango du.
