Zaletuen babesa jaso dute Hondarribiko hiru ontziek
Asteburu honetan etxean lehiatu dira Hondarribia Arraun Elkarteko arraunlariak. Herri osoa berde kolorez tindatu zuten hondarribiarrek.
Asteburu honetan etxean lehiatu dira Hondarribia Arraun Elkarteko arraunlariak. Euskotren eta Euskolabel Ligan dabiltzan ontziek larunbatean izan zuten estropada, eta KAE1 Ligan dabilen Hondarribia Bk igandean.
Larunbatean 7. postuan bukatu zuten jardunaldia emakumeek. Gizonek, aldiz, seigarrenak egin zuten. Emaitzak ez ziren esperotakoak izan, baina horrek ez zuen inola ere kai-muturreko giroa zapuztu. Zaleen animo oihuak eta txaloak ozen entzun ziren hondartza osoan zehar.
Gainera, herri osoak egin zuen bat Hondarribiko Udalak antolatutako Arraun Festak ekitaldiarekin, eta kai-muturraz gain, herri osoa tindatu zuten berde kolorez.
Hurrengo egunean, igandean, Lekeition aritu ziren, eta bertan egindako estropadekin asteburua borobiltzea lortu zuten bi ontziek. Emakumeek seigarren egin zuten, eta gizonek laugarren. Miren Garmendia eta Joseba Amunarriz patroiek, gainera, patroi onenaren mailotarekin jarraitzen dute.
Ikus Euskolabel Ligako emaitzak. Ikus Euskotren Ligako emaitzak.
Igandean ere zaletuen babesa izan zuten Ama Guadalupekoa B ontzian dabiltzan arraunlariek. Etxean lehiatzea berezia izaten da arraunlarientzat, eta indarrak hartuta irten ziren etxeko gazteak.
Estropada txukunetik gorakoa egin zuten etxeko uretan. Lehenengo txanda aise irabazi eta seigarren postuan kokatzea lortu zuten. Aurkari zuzenak atzean utzi eta asteburu honetako emaitzen ondoren, sailkapen orokorrean 10. postuan egonkortzea lortu dute.
Une honetan lau puntuko tartea dute 11. postuan dagoen Camargorekiko, eta sei puntuko aldea azken postuan dagoen Castreñarekiko. Lau estropada geratzen zaizkie aurtengo denboraldian. Hurrengoa hilaren 9an izango dute, Camargon.
Ikus KAE1 Ligako emaitzak.
