Espainiako Txapelketa Absolutuan zapore gazi-gozoa
Olaia Becerrilek eta Victoria Brisok lortu dituzte BATeko emaitzarik onenak. Uxia Pereirak, Iker Arozenak eta Douae Ouboukirrek, ordea, ez dute txapelketa bukatzerik izan.
Alazne Garrido 400 metro hesien proban. Abuztuaren 1etik 3ra jokatu da Tarragonan atletismoko Espainiako Txapelketa Absolutua. Hitzordu garrantzitsua izaten da Bidasoa Atletiko Taldeko kirolarientzat, eta aurtengo balorazioa egiterakoan zapore gazi-gozoarekin bukatu du taldeak.
Klubeko ordezkarien artean, Olaia Becerrilek eta Victoria Brisok lortu dituzte emaitzarik onenak. Becerril luzera jauzian lehiatu zen eta seigarren postuan bukatu zuen proba. 6 metro eta 30 zentimetroko jauziak kokatu zuen postu horretan.
Briso, aldiz, heptatlon proban lehiatu zen eta 8. postuan bukatu zuen txapelketa, finalista postuan. Guztira, 5.306 puntu bildu zituen. Aldi berean, Aslin Quialak, emaitza ona lortu zuen pertika jauzian. Laugarren postuan bukatu zuen txapelketa, baina Kubatarra izanik txapelketatik kanpo lehiatu zen.
Alazne Garrido oiartzuarraren errendimendua ere oso ona izan zela adierazi du klubak. 400 metro hesien proban lehiatu zen eta probako finalerdietan bosgarren helmugaratu zen, kronometroa 1:01,26 minutuan geldituz. Lucia Valero ere finalerdietaraino heldu zen. Valero 1.500 metroko proban lehiatu zen, eta haren seriean seigarren egin zuen (4:35,59 min). Azkenik, Bruno Cagigosek 14. bukatu zuen txapelketa, 48,54 metroko jaurtiketa batekin.
Bertaratu ziren zenbait atletek, berriz, zorte txarra izan zuten, ez baitzuten txapelketa bukatzerik izan. Uxia Pereiraren, Iker Arozenaren, Douae Ouboukirren kasua izan zen hori. Pereirak 100 metro hesietan hesi bat ukitu eta lurrera erori zen. Arozenak arazo fisikoak sumatu eta proba uztea erabaki zuen, eta Ouboukirrek osasun arazoengatik ez zuen txapelketan parte hartu.
Gainera, klubak azaldu duenez, Alaine Agerraldek, Carla Arwenek eta Alejandro Estebanek txapelketan parte hartzeko txartela zuten arren, ezin izan zuten bertan parte hartu. Izan ere, hilaren 7tik 10era izango den 20 urte azpiko Europako Txapelketan parte hartuko dute.
