Gipuzkoako Pentatloi Txapelketa, Euskal Jiraren barruan
Abuztuaren 10ean izango da txapelketa, 11:30etik aurrera. Parte hartzaileek lau proba egin beharko dituzte: harri jasotzea, giza proba, aizkora, txingak eta korrika.
Badator Euskal Jira, eta honekin batera, dagoeneko hirian errotua dagoen beste hitzordu bat: Gipuzkoako Pentatloi Txapelketa. Badira lau urte Euskal Jiraren barruan proba hau egiteari ekin ziotela, eta beste behin, Urdanibia plazan jarri dute abuztuaren 10erako hitzordua. 11:30ean hasiko da txapelketa.
Parte hartzaileek jarraian bost proba egin beharko dituzte, eta denbora motzenean egiten duena izango da irabazle. Harri jasotzearekin hasiko dira, 100 kilogramoko harri zirkularra hogei aldiz jasoz. Jarraian, giza probaren txanda izango da, 400 kilogramoko harria arrastaka eramango dute. Aizkora proban, 45 hazbeteko bi enbor eta 50 hazbeteko bat moztu beharko dituzte. Ondoren, lau plaza egingo dituzte parte hartzaileek 50 kilogramoko txingekin. Bukatzeko, bi kilometroko korrikaldia egingo dute.
Gazteen bi erakustaldi ere antolatu dituzte txapelketa osatzeko, bata emakumeena, bestea gizonena. Jone Uria, Nerea Arruti, Ane Urresti eta Malen Barrenetxeak egingo dute emakumeen erakustaldia. Gizonena, ordea, Jakes Irurtegoiena eta Jon Zalduak egingo dute. Parte hartzaileen bost probak egingo dituzte, euren kategoriara egokituta.
Borja Olazabal Kirol ordezkariarekin batera izan dira Xabier Barrenetxea, Joxe Ramon Iruretagoiena eta Izaskun Arruti Gipuzkoako Herri Kirol Federazioko zuzendaritzako ordezkariak, baita Gorka Emazabel federazioko zuzendari teknikoa ere. Horiekin batera izan dira Xabat Olaizola, Beñat Telleria, Malen Barrenetxea eta Jon Zaldua. Dagoeneko “hirian finkatuta” dagoen ekitaldia dela deritzote, eta Irungo “herritarrek oso modu positiboan erantzuten dutela” ikusten dute.
Urdanibia plaza eta Korrokoitz kale arteko zirkulazioa moztuko dute probak behar bezala egin ahal izateko, 09:00etatik 14:30era bitartean. Santa Elena kaletik Larreaundirantz joateko aukera egongo da.
