Bidasoko jaitsiera, beti bezain "arrakastatsu"
Larunbatean, hilaren 26an, egin zen Bidasoa Ibaiaren Nazioarteko Jaitsiera. 250 palista izan ziren. Gainera, asteburu berean 23 urtez azpikoen Munduko Txapelketan izan dira Carla Corral eta Uxue Arsuaga.
Larunbatean (hilak 26) egin zen 58.ez Bidasoa Ibaiaren Nazioarteko Jaitsiera, eta “arrakastatsua” izan zen, Santiagotarrak Kirol Elkartearen arabera. 250 palista gerturatu ziren lehiaketan parte hartzera, eta beste 50 inguru jaitsiera herrikoira.
Ongi ezagutzen dute ibaia Santiagotarrak-eko palistek, emaitzetan ikusi zen bezala. Izan ere, 30 domina lortu zituzten asteburuan: urrezko hamalau domina, zilarrezko hamaika, eta brontzezko bost. Gainera, lehen postua irabazi zuen Irungo elkarteak, ezberdintasun nabarmenarekin.
Bidasoaren jaitsiera nahikoa ez, eta Zumaian izan ziren igandean (hilak 27) Santiagotarrak-eko kirolariak, Urolaren igoera eta jaitsieran. Berriz ere, lan ona egin zuten Irungo palistek, urrezko bost dominarekin, zilarrezko hirurekin, eta brontzezko batekin itzuli baitziren etxera. Elkartea bigarren postuan gelditu zen.
Hala ere, begirada Portugalen izan dute Santiagotarrak-eko kideek asteburuan, bertan izan baitira Uxue Arsuaga eta Carla Corral, 23 urtez azpikoen Munduko Txapelketan lehiatzen. Ursuagak Alma Robinsonekin batera osatu du K2-a, eta zazpigarren postuan gelditu dira 500 metroko proban. Corralek, ordea, Yaiza Novo, Sara Duran eta Daniela Garciarekin osatu du K4-a, eta hirugarren postua eskuratu zuen 500 metroko proban.
