Segurtasun kamera berriak ezarri ditu Irungo Udalak
Aldapeta eta Pikoketa artean ezarri dituzte, "eremu horren segurtasuna hobetzeko". Aurrekontu parte hartzaileen bitartez gauzatu da eta 150.000 euroko kostua izan du neurriak.
Pikoketan ezarritako kamera bat. Irungo Udalak bideo zaintzako hiru kamera berri jarri ditu martxan. Aldapeta eta Pikoketa artean aurki daitezke, eta udalak adierazi duenez, “gizalegearen aurkako jokabideak ekiditeko eta bertatik igarotzen diren pertsonen segurtasuna indartzeko” baliagarria izango den neurria da.
Kamerak azken belaunaldikoak dira eta 50 metrotarainoko ikusmen ahalmena dute, baita gauez ere. Gainera, pertsonak eta ibilgailuak detektatzeko gaitasuna dute eta mikrofonoarekin soinua denbora errealean hartzen dute. Udalaren arabera, kamerek irudi garbiak eskaintzen dituzte, “baita argi gutxi dagoenean edo kontraste biziak daudenean ere”, argiztapen teknologia hibridoari eta maila dinamikoko sistemari esker.
Bestalde, kameren kokalekua ez dela ausazkoa izan azaldu dute ere, “estrategikoki banatu dira plazako sarbide eta elkargune nagusiak hartzeko eta puntu itsuak saihesteko”. Horiek Udaltzaingoaren bideo zaintzako gailuaren sarera konektatuta daude, jarraipena egin dezaten.
Partaidetza programa
Honako herritarren Partaidetzaren Arloak abiatu zuen aurrekontu parte hartzaileen bitartez hartutako neurria da, eta 150.000 euroko kostua izan du guztira.
Jon Ugarte Gobernu Irekiaren eta Herritarren Arretarako ordezkaria “pozik” agertu da parte hartzailetza programarekin , “programak herritarrei hitza eta botoa emateko aukera ematen dielako”. Hori dela era, irailean prozesu parte hartzaile berri bat zabalduko dutela iragarri du.
