Hondarribia Arraun Elkartea gorantz begira jarri da
Hondarribia A ontziak ohorezko txandan jarraitzen du, emakumeek jaitsiera zuzena saihesten jarraitzen dute, eta Hondarribia Bk ligako asteburu onena egin du.
Hondarribia Castroko uretanAitor Arrizabalaga / TKE Eusko Label eta Euskotren Ligen erdia jokatu da dagoeneko eta KAE1 Ligan bost estropaden faltan dira. Hondarribia Arraun Elkarteko hiru ontziak lan txukuna egiten ari dira aurtengo denboraldian, nor bere mailan aurrerapauso sendoak emanez.
Euskotren Liga izan da asteburu honetan jokatzen lehena. Getxon izan zuten lehia eta hondarribiarrak azken postuan amaitu zuten jardunaldia. Hurrengo egunean, ordea, arantza ateratzeko aukera izan zuten. Castroko uretan aurkari zuzena duten Donostiarra ontziarekin borroka estua izan ondoren, bigarren helmugaratu ziren eguneko lehen txandan. Hori dela eta, donostiarrek Getxon atera zieten puntua berreskuratzea lortu zuten.
Sailkapen orokorrean bosgarrenak izan ziren gainera, bigarren txandako Hibaikak azkena egin baitzuen. Beraz, zapore gozoarekin itzuli ziren herrira. Asteburuko garaipenak Arraun Lagunak eta Oriorentzat izan ziren, hurrenez hurren. Ikus emaitzak.
Emakumeen ondoren, Eusko Label Ligari ematen zaio hasiera. Getxon bosgarren eta Castron laugarren egin zuen Ama Guadalupekoak. Asteburu honen ondoren, beraz, sailkapen orokorreko laugarren postua mantentzen jarraitzen dute. Bosgarren sailkatuarekiko (Urdaibai) bost puntuko aldea dute berdeek. Ikus emaitzak.
Patroi onenaren saria
Beste asteburu batez patroi onenaren mailota soinean dutela aritu dira Hondarribiko bi ontziak. Joseba Amunarrizek 63 puntu dauzka eta bigarrenari, Gorka Aranberriri, 9 puntu ateratzen dizkio. Miren Garmendiak, aldiz, hasieran tarte handixeagoa zuen arren, une honetan puntu bakarrera du Orio traineruko lemazaina. Miren Garmendiak 43 puntu dauzka, Maider Etxanizek 42.
-
- Aitor Arrizabalaga / TKE
-
- Aitor Arrizabalaga / TKE
Hondarribia B gorantz begira
Arraun elkarteko gazteenak gorantz begira jarri dira asteburuan. Larunbatean Marina de Cudeyon hamargarren egin zuten, eta igandean, Santurtzin, zazpigarren.
Zenbait astez KAE1 Ligako azken postua bete ondoren, bi postu gora egin dute berdeek. Hamargarrenak dira une honetan, Castreñarekin 34 puntutara berdinduta eta hamabigarren postutik puntu bakarrera.
