San Migel Anaka urbanizatzeko lanak onartu dituzte
IRUNVI-k San Migel Anako babes ofizialeko etxebizitzak eraikitzeko lanak kontratatzeko pleguak onartu ditu. Lanak burutzeko 48 hilabeteko epea irekiko dute.
IRUNVI Irungo Etxebizitzarako Elkarte Publikoko administrazio kontseiluak San Migel Anaka urbanizatu eta bertan babes ofizialeko etxebizitzak eraikitzeko pleguak onartu ditu. 30.026.466,22 euroko lizitaziorako aurrekontua izango du, eta gaurtik hasita 66 eguneko epea aurkeztu dute eskaintzak aurkezteko, hau da, irailaren 28 artekoa. Esleipena urte bukaeran egitea aurreikusten du IRUNVI-k. “Estrategikotzat” jo du etxebizitza etxebizitzarako elkarteak, “bai bere dimentsio eta inbertsio ekonomikoagatik, bai hiriaren garapen urbanoan duen eragin zuzenagatik”.
Ekainean formalizatu zuten babes ofizialeko 147 etxebizitza (BOE) eraikitzea. Halaber, Eusko Jaurlaritza 447 BOE-ren xehetasunezko azterlana tramitatzen ari da, alokairu erregimenean esleituko direnak.
Donostia kaletik hasi eta eremu osoan zehar, 1.175 etxebizitza berri eraikiko dituzte, eta horietatik 887 izango dira babes publikokoak. Horrekin batera, auzorako ekipamendu publikoa ere eraikiko dute, “hala nola igerileku publikoak eta bestelako kirol ekipamenduak, baita aparkaleku berri bat ere”. Eremutik kanpo dauden zenbait gune berrurbanizatuko dituzte, nagusiki Jaizkibel kalean eta Letxumborro hiribidean.
Auzoen arteko lotura
Lanen eraginez, San Migel Anaka eremuan auzo berria sortuko da, Anaka eta San Migel auzoak lotuko dituena. “Hiriaren alderdi guzti hori eraldatuko du eta beste hiri eredu bat bilakatuko du, konektatuago eta jasangarriagoa”.
Bizikletan edo garraioan publikoan joan-etorriak errazago egitea ahalbidetuko du honek, “auzoak elkartu eta espazioak hurbilduz”. “Auzokideen arteko topaketa eta belaunaldi berrientzat pentsatutako etxebizitzak erraztuko dituzten ekipamenduak izango ditu, eta horrek espazio publikoa eta bizitza urbanoa biziberritzea, gizarte kohesioa indartzea eta tokiko ekonomia bultzatzea ekarriko du, 1.000 familia egoiliar berri etorriko direlako”.
“Luzaroegi” degradazio egoeran egon den “hutsunea” beteko du urbanizazioak, eta Anaka eta San Migelek “hiriko ertzak” izateari utziko diote.
Lanak egiteko 48 hilabeteko epea
Lanak egiteko 48 hilabeteko epea eskatuko dio IRUNVI-k esleitutako enpresari. Hasiera batean 72 hilabeteko epea aurreikusten baldin bazuten ere, udalak eta Jaurlaritzak “borondate argia erakutsi dute Babes Ofizialeko Etxeak ahalik eta azkarren has daitezen, datorren urtean alegia, eta horrek esan nahi du urbanizazio obrak ahalik eta epe laburrenean amaitu behar direla, eraikuntza obrak amaitu ondoren etxebizitzak entregatu ahal izateko”.
Zenbait eskakizun egiten dizkie onartutako pleguak hautagaitza aurkezten duten lizitatzaileei: eskolari eragiten dioten lanak udan egitea, aurrealdea erabiltzeko oztoporik ez dezatela izan patioaren handitu arte, auzoarentzako behin-behineko aparkalekua bermatzea, eta San Migel eta Anaka arteko pasabidearen ordezko pasabide alternatibo bat egitea.
