Arrazakeriari ateak itxi dizkio Irunek
Atzo arratsaldean arrazakeriaren aurkako elkarretaratzea egin zuten San Juan plazan. Auzo patruilen izaera "arrazista" salatu zuten hamaika eragilek deituriko mobilizazioan.
“Irun harrera herria da” edo “inor ez da ilegala” bezalako oihuek hartu zuten atzo Irungo San Juan plaza. Izan ere, Euskal Herriko beste zenbait lekutan gertatu den bezala, “Irun ere astindu du olatu erreakzionario horrek”, eta hori salatzeko elkarretaratzea egin zuten Arrazakeriarik ez, ez hemen, ez inon. Faxismoari stop lelopean, 19:00etan.
Ekintzaileek azaldu dutenez, badira hainbat hilabete “ideologia neonaziko” taldeak “inpunitate osoz gorroto diskurtsoak” zabaltzen ari direla hirian, “hainbat gazte kolektibo mehatxatuz”.
Auzo patruilez ari dira, “pertsonak itxuragatik edo jatorriagatik seinalatzen eta jazartzen dituzten” horietaz. “Bizikidetza sumintzen eta hondatzen” duten taldeak direla azpimarratu zuten elkarretaratzean, “eskuin muturreko diskurtsoa zabaltzeko baino ez baitute balio”.
Horregatik, auzo patruilak ez direla “konponbidea” nabarmendu dute, “arazoa baizik”. Jarrera arrazistek baino, “harrera lekua delako ezaugarritu dela Irun” iruditzen zaie antolatzaileei, zer esanik ez Irungo Harrera Sareak “pertsona migratuekiko elkartasunez” egindako lana ikusiz.
“Olatu erreakzionarioaren” aurrean “nahikoa” dela esan dute “zapalkuntzarik eta segregaziorik gabeko etorkizunaren alde” egiten duten irundarrek. “Migratzaileen, emakumeen, LGTBIQ+ komunitatearen, langileen, adinekoen eta gazte zaurgarrien eskubideak zapaltzeak eta murrizteak ez gaitu askeago egiten”.
Eragile ugari batu ziren atzoko elkarretaratzean arrazakeriaren aurka egitera: Irungo Harrera Sarea, SOS Arrazakeria, Larreaundi-Olaberria Auzo Elkartea, Lakaxita Gaztetxea, Bor-bor, Antxeta Irratia, LAB sindikatua, Sortu, Moskuko jaien asanblada, Ernai, Irungo Antifaxistak, Hiritarron Harrera Sarea, Basajaun Elkartea eta Kaleko Afari Solidarioak.
Dei argi batekin bukatu zuten mobilizazioa: “Irunen intolerante eta xenofobo ez beste guztientzat lekua dago”. Gainera, atzoko elkarretaratzea lehen urratsa besterik ez zela jakinarazi zuten, eta aurrerantzean faxismo eta arrazakeriaren aurka antolatzeko mezua zabaldu zuten.
