Urrezko Intsignia aukeratzeko parte hartze prozesua zabaldu dute
Hirugarren urtez jarraian herritarrek aukeratuko dute Urrezko intsigniaren onuraduna nor izango den.
Urrezko intsignia hiriaren jardunean aktiboki eta nabarmen jardun duten pertsona edo entitate juridikoei banatzen zaie, eta herritarren parte hartzea “ahalduntze sozialerako tresna” izanik, helburu biak uztartzea aproposa iruditu zitzaion udalari orain hiru urte. Lehen bi urteetako arrakasta ikusirik, aurten ere formula bera errepikatzea erabaki dute.
Lehendabizi proposamenak egiteko epea zabalduko dute (hilaren 29ra arte egin ahal izango dira), eta udal batzordeak hiru finalistak aukeratu ondoren, horien artean bozkatzeko aukera izango dute abuztuaren 7tik abuztuaren 21era bitarte.
Proposamenak egiteko epea zabalik dago jada. Pertsona bakoitzak pertsona edo entitate bakarra proposatu ahal izango du. Izapideak udal webgunearen bidez edo BAZ bulegoan egin behar dira (astelehenetik ostiralera 08:00etatik 14:00ak arte).
Emaitza abuztuaren 26an jakinaraziko dute eta intsignia, urtero bezala, hilaren 7an banatuko dute.
