Udazkenean irekiko dute CBAko kulturgune berria
CBAn kultura sustatzeko gune berri bat eraikitzeko lanetan ibili dira azken bi urteetan. Musikarako, erakusketetarako eta gazteentzako gune bana izango du.
Bi urtetik gorako lanen ondoren, Carlos Blanco Aguinaga zentroak izango duen kulturgune berria eraiki dute dagoeneko. Instalazio berriak bisitatu dituzte gaur, hilaren 21ean, Cristina Laborda alkateak, Nuria Alzaga lehen alkateordeak, Gorka Alvarez Obrak, Mantentze Lanak eta Azpiegiturak arloko ordezkariak, eta Sandra Caballero Gazteria arloko ordezkariak. 4,2 milioi euroko aurrekontua bideratu da lanetara, eta guztira 2.400 metro koadro baino gehiagoko espazioa eskuratu du Irunek. Alvarezek dioenez, “etxeko obretan bezala, badakigu noiz hasten diren, baina ez noiz bukatuko diren”. Bada, data zehatzik oraindik ez dagoen arren, udazkenean inauguratuko dutela iragarri dute.
Kultura “gizarte eraldaketarako eta gutako bakoitzaren eraldaketarako” tresna izanik, gune berria inauguratzear egoteaz “harro” agertu dira udal ordezkariak. San Juan ingurua eraldatzeko urte askoko prozesu baten barruan sartzen den urratsa dela azpimarratu du alkateak, eta 2010ean San Juan nolakoa zen oroitarazi du: ibilgailuz betetako plaza.
Ordutik, espazio publikoa berreskuratu eta hiriaren erdigunea kulturarako eremua izateko lanean dabil udala, urrian CBA udal liburutegiarekin irekieraren 10. urteurrena izango delarik. Baina, liburutegia hor egoteak, eraikin hutsa izateaz harago, kultur ekimen ugari sustatzea eragin du: kontzertu txikiak, tailerrak, ipuin kontakizunak…
Norabide horretan, urrats berri bat izango da kulturgune berria. Orain arte zenbait kultur egitarau egon baldin badira ere, ez zegoen horiek behar bezala hezurmamitzeko toki egokirik. Hirian adierazpen artistikoa lantzeko eta erakusteko gunerik aurkitzen ez zutenek, izango dute non egin udazkenetik aurrera.
Alzagaren ustez, gunearen irekiera inflexio puntu garrantzitsua izango da. “Gune fisikoaz harago” doala zehaztu du, “kultura kontsumitzeaz harago” gazteek “kulturaren aktibistak” izateko aukera izango dutelako aurrerantzean. Horregatik, “harrotasunaz” gain, “urduritasuna” ere eragiten dio udazkeneko inaugurazioak. “Publiko guztiarentzako kalitatezko egitarau anitza” prestatzen ari direla baietsi du, baina, herritarrak ere proposamenak egitera deitu ditu.
Kultura sustatu eta ekoizteko zenbait gune
Musika zuzenean egiteko Irun Zuzenean aretoa izango da berrikuntzetako bat. 360 pertsona sartuko dira zutik, eta 157 eserita. Gainera, “besaulki mugikorren bidezko sistemari esker, eszenatoki zentral bat sortu ahalko da”. Kontzertu, ikus entzunezko ekoizpen edo dantza ikuskizunak, denetarik ikusteko aukera egongo da. Hiritarrei kultur eskaintza zabalaz gozatzeko aukera emateaz gain, Irungo taldeek oholtza bat izateko tokia ere izango da.
Ireki Art gunea, aldiz, “talentu sortu berriari arreta berezia eskainiko” dion erakusketa aretoa izango da. “Topaketarako, bitartekaritzarako, arte, kultura eta sormenarekin kontaktuan egoteko plaza esperientzial” gisa aurkeztu dute ordezkariek.
“Sormen artistikoa eta industria sortzaileak” bultzatzeko programa izango da Kontenporanea. Espazio publikoan artea ikusgarri egin nahi du ekimenak, artea eta gizartearen arteko lotura sendotuz. Arte garaikideko Ribera, Soinulabor eta Artistentzako Laguntzak programek espazio berrian izango dute egoitza.
Gunearen xede talde nagusietako bat gazteak izanik, GazteARTEan-ek ere bertan izango du bere egoitza udazkenetik aurrera, “informazioaren, bitartekaritzaren, aholkularitzaren eta akonpainamenduaren bitartez gazteen parte hartzea bultzatzeko”. Izan ere, Caballero Gazteria arloko ordezkariak nabarmendu duenez, “gazteek sormena garatzeko espazio bat behar dute erdigunean”. Irungo gazteak kulturgune berrira hurbilduz “garapen pertsonala, soziala, artistikoa eta kritikoa sustatzeko” asmoa du. Horregatik, espazioa gazteen “interes, gustu eta beharretara” egokitu dutela ziurtatu du. Halaber, liburutegiarekin batera erreferentziazko puntu bilakatuko dela uste du, gaur egun jada gazte ikasle asko elkartzen baitira liburutegian, eta eremu berriarekin ikasteaz gain “ondo pasatzeko” gunea ere izango baitute.
Gainera, zirkulaziorako gune izango dela espero du alkateak, Jesus kalera San Juan plazatik iritsi baldin badaiteke ere, espazio berria irekitzean CBAtik ere iristeko aukera egongo delako; eta beraz, alde batetik bestera mugimenduan daudenek kulturaz gozatzeko aukera izango dutelako.
