Asteburu borobila Hondarribia Arraun Elkartearentzat
Eusko Label eta Euskotren Ligen hiru laurden jokatu dira dagoeneko. A ontzia laugarren da sailkapenean, emakumezkoak seigarren, zuzeneko jaitsiera postua atzean utzita.
Hondarribia Arraun Elkartearentzat asteburu ezin hobea izan da Gipuzkoako uretan; asteburuan Pasaian eta Orion lehiatu dira. Emakumeek ligako arrisku postuak atzean utzi, seigarren kokatu eta zuzeneko jaitsiera suposatzen duen postuan dagoen Donostiarrari sei puntu atera dizkiote. Gizonezkoen kasuan, bi hirugarren postu lortu dituzte, eta datorren asteburuan ohorezko txandan arituko dira. Egun laugarrenak dira sailkapen orokorrean.
Pasaian eremu berri batean aritu ziren arraunlariak, erlojupeko modalitatean. Gizonezkoen eremua Kontxako badian izaten dutenaren antzeko baldintzak izan zituen, emakumeena, berriz, badia barruan egin zen. Euskotren Ligako lehia izan zen aurrena eta, sailkapenaren arabera, Hondarribiarrak lehen postuan irten ziren. Erreferentziarik izan gabe beren lana txukun burutu eta Donostiarraren eta Astilleroren aurretik sailkatzea lortu zuten, 6. postuan. Igandean, aldiz, lehen txanda irabazi eta denbora bikaina eginez hirugarren sailkatzea lortu zuten. Ikus emaitzak.
Hondarribia A ontziaren kasuan, Pasaian bigarren txanda aise dominatu eta ezustekoa eman zuen Ama Guadalupekoak, estropada irabazi zuen Zierbenaren eta Orioren atzetik geratzea lortu baitzuen. Igandean ohorezko txandan aritu ziren, eta eguraldi aldaketak azken txandari bereziki eragingo ziola zirudien arren [itsasoko egoerak okertzera egin zuen], berdeek gogor estutu eta olatuak aldeko izatea lortu zuten. Ohorezko txandan Orioren atzetik helmugaratu eta jardunaldiko sailkapenean lehen txandan aritu zen Lekittara soilik sartu zitzaien tartean, asteburu benetan borobila osatuz. Ikus emaitzak.
KAE1 Ligan dabilen Hondarribia Bk ere egun gozoa izan zuen larunbatean. Zarautzen izan zuten estropada eta erlojupeko modalitatean izan zen. Sailkapenean laugarrenak izan ziren eta bildutako puntu mordoskari esker Castreñari aurrea hartzea lortu zuten. Igandean, aldiz, Gorlizen izan zuten lehia. Honakoa ere erlojupekoan. Hondarribiarrek azken aurren egin zuten. Une honetan azkenak dira sailkapen orokorrean Castreñatik puntu batera. Ikus emaitzak.
