Onavibe, Merina Gris, La Txama, Kaotiko, Mirua eta Errobi besteak beste Hondarribiko festetan
Bentako kontzertu nagusien zein bestelakoen berri eman du Hondarribiko Udalak. Kasino Zaharrean, gazteenentzako jarduerak.
Merina Gris taldeak irailaren 6an joko du herrian. Hondarribiko Jai Nagusietan izango den musika programazioaren berri eman du Hondarribiko Udalak. Kontzertu nagusienak Bentako gunean izango dira, txosnagunean. Gainera, Kasino Zaharrean nahiz Arma Plazan ere izango dira ikuskizunak.
Bentako kontzertuei dagokienez, lehena irailaren 5ekoa izango da. 22:30ean hasita, Stoldak, Onavibe eta Zopilotes Txirriaos taldeak ariko dira festetako oholtza nagusian. Hurrengo egunean (irailaren 6an), 00:00etatik aurrera, Merina Gris izango da egun horretako Bentako kartelburua, eta ondoren DJ Aitana Grandes ariko da musika jartzen. Hurrengo emanaldi handia irailaren 8koa izango da: 23:00etan hasira, La Txama eta Muxutruk! taldeek jarriko diote doinua alardearen eguneko gauari.
Bentako emanaldiekin jarraituz, irailaren 9an (asteartea) Kaotikoren txanda izango da, 22:30ean hasita. Egun eta ordu berean, baina Arma Plazan, Maricahi Principal de Mexico taldeak kantu mexikarrak eskainiko dizkie han bilduko direnei. Hurrengo egunean, irailaren 10ean (22:00) Mirua eta Iratzar erromeria taldeek dantzan jarriko dute itsaso ondoko gunea; egun horretan, ordu berean, La lazarilla komedia kritikoa ikusi ahal izango da Arma Plazan.
Festen azken egunean, irailaren 11n (osteguna) Bentako azken kontzertua Errobi talde historikoarekin.
Kasino Zaharrean, Gazte Kanttua
Kasino Zaharrean ere izango dira musika emanaldiak, kasu honetan, publiko gazteenarentzat. Irailaren 6an (larunbata) 17:00etatik 21:00etara bertako lorategietan 12 urtetik gorakoentzat Gazte Kanttua egitasmoaren barruko saioa egingo dute, eta kamiseta pertsonalizatuak egiteko aukera izateaz gainera, Erik Troitiño DJak eta Zatekeen erromeria taldeak saioak eskainiko dituzte.
Irailaren 9rako ere jarduerak Kasino Zaharrean, 12-16 urteko gazteek Gazte Kanttuaren barruko jokoak eta gazte parkea izango dituztelako.
Gazte Kanttuaren hurrengo ekitaldia irailaren 10erako programatu dute, kasu horretan 16 urtetik gorakoentzat: techno gaua izango da, N97 kolektiboarekin, eta Irune Muguruza nahiz Jota DJekin.
Berritasunak
Jaiak hasteko aste dezentye falta diren arren, udalak egitarauari dagozkion hainbat ekitaldiren berri eman du. Berritasunak izango direla aipatu du. Horien artean, festen aurretik bat: irailaren 3an, 17:·0ean eta Ama Guadalupekoa ikastetxetik hasita 10-14 adin tartekoentzat txirrindularitza proba bat izango da.
Gainera, berritasunen artean, gazteei begirako zirku tailerra ere izango dela zehaztu du udal erakundeak: irailaren 5ean (17:00) eta 9an (11:00-13:30 eta 16:30-19:00) zirku tailerra izango da Kasino Zaharrean
