159 lan eman dizkio Mensuk Udalari
Amaia KZn ikusgai egongo da abuztuaren 31 arte lanen erakusketa. Gainera, hilaren 22an Mensuren lanei eta Bidasoko pinturari buruzko mahai ingurua egingo dute.
Jose Mensuro ‘Mensuk’ bere 159 lan dohaintzan eman dizkio Irungo Udalari, hala egingo zuela jakinarazi eta hiru urtera. Bihartik, hilaren 18tik, aurrera ikusgai egongo da lanen erakusketa Amaia KZn, abuztuaren 31ra arte. Asier Mensuro da erakusketaren komisario.
Cristina Laborda, Irungo alkatea; Nuria Alzaga, Udaleko Kulturako ordezkaria; eta Mensu elkartu dira erakusketa aurkezteko, eta dohaintza dokumentua ofizialki sinatzeko baliatu dute.
Gai eta lan ugarik osatzen dute lana. Bi areto Iruni buruzko lanek bete dituzte, eta Non bizi da isiltasuna eskultura prestatzeko maketak Arbesen daude.
Aurretik ere bazeuden Mensuren beste zenbait lan, beraz, “dohaintzak bilduma osatuko du, eta Udalaren ondare historiko artistikoa aberastu”. Gainera, bere lanetan Irungo bazter ugari agertzen dira: Ama Xantalen ermita, edo pasiotarren eliza eta udaletxea San Joan Suak argituta. Horregatik, Alzagak “Irungo memoria bisualerako ekarpen baliotsua” dela deritzo, “hiriaren azken urteetako iraganari behatzeko aukera ematen baitu”.
Asteartetik igandera arte dago zabalik Amaia KZko erakusketa aretoa; asteartetik larunbatera 18:00etatik 21:00etara, eta igande eta jai egunetan 11:30tik 13:30era.
Mensuren lan eta eskualdeko pinturari buruzko mahai ingurua, hilaren 22an
Erakusketaren norabide berean, Mensuren lan eta Bidasoko pinturari buruzko mahai ingurua antolatu dute hilaren 22rako. Javier Sagarzazu eta Javiert Arizabalo izango dira Mensurekin batera, eta Asier Mensurok dinamizatuko du. Mahai inguruaren ondoren, Mensuk bisita gidatua egingo du.
Hilaren 22an, 19:00etan, Amaia KZn jarri dute hitzordua.
