Hiru totem berri eta laguntzaile birtuala, turismoa bultzatzeko
Turismo, kultura eta merkataritza jarduerei buruzko informazioa zabalduko dute totem interaktiboetan. Halaber, Udalaren eta Bidasoa Turismoaren webguneetan laguntzaile birtuala eta ibilbideen planifikatzailea gehitu dituzte.
Udaren iritsierarekin, hainbat berrikuntza aurkeztu ditu Irungo Udalak. Batetik, hiru totem interaktibo instalatu dituzte. Turismo, kultur agenda eta tokiko merkataritzari buruzko informazioa zabalduko dute horietatik. Bestetik, Udalaren eta Bidasoa Turismoaren webguneek Iruntxo izeneko laguntzaile birtuala izango dute aurrerantzean, baita esperientzia pertsonalizatuak sortzea ahalbidetuko dien ibilbide planifikatzailea ere.
Totemetako bat jarriko duten Jenaro Etxeandian aurkeztu dituzte berrikuntzak. Bertan izan dira Cristina Laborda alkatea, Nuria Alzaga Hiri Bultzadako ordezkari eta Bidasoa Bizirikeko lehendakaria, Juanjo Jimenez Oiasso Museoko koordinatzailea, Eva Fernandez Bidasoa Bizirikeko zuzendaria, Susana Fernandez eta Jose Mari Gonzalez Bidashopeko ordezkariak, David Villalba Denok Bateko ordezkaria, eta Tomas Maeztu Mugan elkarteko ordezkaria. Irungo turismoa “sustatzeko eta biziberritzeko” plangintzaren baitako egitasmoak direla azaldu dute.
Guztira, 38.720 euroko aurrekontua eskatu dute bi proiektuek.
Totem interaktiboak
Jenaro Etxeandia plazan, Luis Marianoko turismo bulegoaren ondoan eta Euskotren geltoki inguruan kokatu dituzte hiru totem berriak. Izan ere, “joan-etorri” askoko gunea da, baita saltoki, taberna eta jatetxe ugarikoa.
Adimen artifizialaren bidez funtzionatzen dute totemek. Hiritarrek eta bisitariek “modu erraz eta intuitiboan” turismo, kultur eta tokiko saltokoei buruzko informazioa eskuratzeko aukera izango dute.
Webguneetako berrikuntzak
Udalaren eta Bidasoa Turismoren webguneek Iruntxo deitzen den laguntzaile birtuala izango dute aurrerantzean. Adimen artifizialaren bidez funtzionatuko du, eta 95 hizkuntzatan komunikatzeko gai izango da.
Ibilbideen planifikatzaileari esker erabiltzaileak bere nahien araberako esperientzia pertsonalizatua sortzeko aukera izango du: “Esperientzia pertsonalizatu bat dakar, ibilbide propioak sortzen baititu bidaiariak hautatu dituen intereseko jarduerekin”. Erabiltzaileak egonaldiaren data, zer bisitatu nahi duen, eta norekin egongo den adierazi dezakete, eta datu horiek erabiliz adimen artifizialak proposamen oso bat osatuko du.
