Bigarren urtez aktibatu dute Bertatik Bertara kanpaina
Iaz herriko 12 entitatek parte hartu zuten, aurten 32 izango dira. Horiei hiztegia duen mahai-gainekoak, euskaraz aritzeko oinarri-oinarrizko hiztegi fisikoak, diptikoak edota kanpainaren kartelak banatu dizkiete.
Alde Zaharreko zenbait ostalari. Bertatik Bertara UEMAren kanpaina bat da, bisitariei, zerbitzu sektoreko langileei eta herritarrei euskarak duen garrantzia ikusarazteko helburua duena. Hondarribiak bigarren urtez segidan egingo du bat kanpainarekin.
Ongi Etorri Euskararen Herrira! lelopean, hiztegia duen mahai-gainekoak, euskaraz aritzeko oinarri-oinarrizko hiztegi fisikoak, diptikoak edota kanpainaren kartelak banatu dizkiete herriko hainbat ostalaritzei.
Material horiek, gainera, QR bat daramate, eta haren bidez euskaraz aritzeko hiztegi digital eramangarria izateko aukera izango dute. Itzulpenak gaztelerara, katalanera, galiziera, frantsesera edo ingelesera egiteko aukera duena.
Atxikimendua handitzen
Hondarribiko Udaleko Euskara Sailetik egindako lanketari esker kanpainara atxikitu diren merkataritza eta ostalaritza entitateak biderkatu egin dira. Iaz 12 entitatek parte hartu zuten, aurten 32 izango dira. Horietan guztietan euskarazko euskarriak aurkituko dituzte bisitari zein herritarrek.
Alde Zaharreko Tatapas, Batzokia, Larra, Gure Ametsa, Alameda, Aindire, Palacete, Danontzat, Ttopara, Badia, eta Medievo; Kirol Kaiko Basque Taberna, Kalima Jatetxea, El Curry Verde eta Casa Santamaria; eta Portua auzoko Ardoka Sagardotegia, Zabala, Ondarribi, Txantxangorri, Branka, Gaxen, Enbata, Hondar, Loretxu, Miramar XXL, Amona Margarita, Route 33, Ignacio, Lekuona, Maite, Itxaropena eta Itxaspe dira aurtengo parte hartzaileak.
Garoa Lekuona Euskara zinegotzia oso pozik agertu da aurten kanpainak izan duen harrerarekin. Hala ere, euskara normalizatzeko eta haren erabilera sustatzeko pauso gehiago eman behar direla argi du zinegotziak. Horregatik, udazkenean lanketa sakonagoa egin asmo dutela aurreratu du, herriko taberna, kafetegi eta jatetxeetan, bakoitzari zerbitzu pertsonalizatua eta doakoa eskainiz.
Izan ere, euskararen erabilera normalizatzea “erronka handia da” herrian. Soilik elkarrizketen %16 dira bakarrik euskaraz. Zentzu horretan, taberna, kafetegi eta jatetxeen garrantzia nabarmendu du Lekuonak, “garrantzitsua da euskara taberna, kafetegi eta jatetxeetan ere presente egotea, eta lanketa horri ekingo diogu udazken honetan”, esan du.
