Erromatar garaiko egunerokoa ikusgai, Oiasso Museoan
'Gutxiengo Itzel Hori' erakusketa ireki dute gaur Oiasso Museoan eta abuztuaren 24ra arte egongo da zabalik.
Erromatar Inperioko gizartearen aniztasuna erakustea helburu duen Gutxiengo Itzel Hori erakusketa ireki dute gaur Oiasso Museoan gaur eta bertan izan dira Cristina Laborda alkatea, Nuria Alzaga Kultura ordezkaria, Meridako Antzerki Klasikoko Nazioarteko Jaialdiko zuzendari Jesus Cimarro eta Meridako Antzerki Klasikoko Nazioarteko Jaialdiko Patronatuaren Partzuergoko gerente Pedro Blanco.
Erakusketak abuztuaren 24ra arte iraungo du eta bidaia bat da proposatzen duena. Bidaia horretan lana, fedea, borroka eta inperioko kideen eguneroko bizitza jorratuko dute eta asmoa da ikusleak deskubritzea hiria “hurbilekoagoa” eta “humanoagoa” dela.
Nekazariak, artisauak, soldaduak, merkatariak, emaginak edota gladiadoreak ikusi ahalko dira. “Boterearen bazterretan baina benetako historiaren erdian bizi, maitatu, borrokatu eta hildakoen istorioek ehundutako bidaia da”. Eguneroko bizitza da ardatz nagusia.
Erakusketa honen harira, Irungo alkateak Irun eta Meridaren arteko harremanaz aritu da: “Erakusketa osatzen duten pieza arkeologikoek Oiasso eta Emerita Augusta lotzen dituzte, zuzenean lotu ere, eta gure hiri eta museoaren eta Extremadurako hiriburuaren eta Meridako Antzerki Klasikoko Nazioarteko Jaialdiaren arteko harreman onaren eta gertutasunaren adierazgarri dira”.
Irunen ez ezik, aldi berean Lisboako Antzerki Erromatarraren Museoan egongo da ikusgai erakusketa. Hau suertatu da bi museoen arteko lankidetza ildo iraunkor bati esker, Meridako Antzerki Klasikoko Nazioarteko Jaialdiak sustatutako erakusketen egoitza izan baita Portugalgo hiriburukoa.
