Hogei proposamenetik gora udako kultur agendan
Iraila bukaera arteko kultur agenda aurkeztu dute gaur Zabaltza plazan. Hainbat jardueraren artean Fermin Muguruza, Sorotan Bele eta Irun Hiria Musika Banda, eta Claire Martin Quarteten kontzertuak nabarmendu dituzte.
Udako kultur agenda aurkeztu dute gaur, hilaren 10ean, Zabaltza plazan. Iraila bukaera arte hogei jardueratik gora antolatu dituzte, “adin eta gustu guztietako jendearentzat”. Eskaintza zabalaz gozatzeko aukera izango dute irundarrek: kontzertuak, ikuskizunak, erakusketak, zirkua…
Udalaren webguneaz gain, Zabaltza plazako informazio totemean ikus daiteke egitarau osoa. Miriam Merino artista irundarrak egin du diseinua, Kultur Zerbitzua bertako artista eta ilustratzaileekin lan egiten saiatzen baita.
Hitzordu ugari ditu udan Irunek: Euskal Jira, Girabira, Trapu Zaharra konpainiaren antzerkia, Santiago kaleko polkak, edota Ostomila Txotxongilo Taldearen emanaldia, beste hainbesteren artean. Baina, egitarau oparoaren baitan, hiru emanaldi nagusi azpimarratu ditu Udalak. Batetik, hilaren 18an, Irun Hiria Musika Bandak Sorotan Belerekin kontzertu berezia emango du. Bestetik, hilaren 25ean, Claire Martin Quartet jazz kantari erresuma batuarrak kantatuko du. Azkenik, abuztuaren 14an Urdanibia Plazan izango da Fermin Muguruza, Moskuko Jaien baitan.
