2023-2027 legealdi erdiaren balorazioa egin du Hondarribiko EAJk
Abotsanitzen kudeaketan eta egiteko moduan zentratu dira jeltzaleak bereziki. Aurrera eraman dituzten jardueretako asko EAJk egindako lanaren ondorio direla adierazi dute.
Hondarribiko EAJk 2023-2027ko hauteskundeetara aurkeztu zuen taldea. Igor Enparanek Abotsanitzen izenean aginte makila hartu zuenetik bi urte igaro diren honetan, Hondarribiko EAJ alderdiak 2023-2027 legealdi erdiaren balorazioa egin du, bereziki, Abotsanitzen kudeaketan eta egiteko moduan zentratuz.
Batetik, aurrera eraman dituzten jardueretako asko aurreko udal gobernuak egindako lanari esker egin dituztela adierazi dute; hala nola, San Nikolas zubiaren lehengoratzea, Santiago kaleko eta Arrantzale auzoko urbanizazioak edota Muliateko Gizarte Zerbitzuen gune berria. Aldi berean, udal langileak egonkortzeko prozesuari dagonionean, plantillak finkatzea ahalbidetu duen lanketa jeltzaleek hasi zutela esan dute.
Bestetik, udal gobernu talde berriak kudeatu behar izan dituen gaien inguruan mintzatu dira. Saindua Gaztelekuko lanak, adibidez, 2019-2023 legealdi amaieran onartu ziren eta egun, urtebete baino gehiagoko atzerapena duen proiektua da. Bertan gertatzen ari denari buruz ezer ez jakitea deitoratu dute jeltzaleek.
Hortaz gain, San Marko parkearen adibidea jarri dute ere. Kasu honetan, berritze prozesu bat hasi zuen udalak, eta egindakoa “egin behar ez denaren adibide” izan zela adierazi dute.
Diskurtsotik praktikara
Gauzak beste modu batera egiten ari direla adierazi du Abotsanitzek behin eta berriz, baina jeltzaleen ustez kontrakoa egiten ari dira: “Plan Orokorra edo terrazen ordenantza berria bezalako funtsezko prozesuetan, informazioa berandu entregatu da, aztertzeko denbora nahikorik gabe, eta oposizioko taldeekin lan egiteko espazio errealik sortu gabe. Eta hala eta guztiz ere, gure babesa eskatzen da. Ezin da parte hartzeaz hitz egin aldebakarrez jarduten den bitartean, gehiengo absolututik haragoko adostasunak entzun edo eraiki gabe”.
Gainera, egungo gobernuak “zenbait atzerapauso” eman dituela adierazi dute. Bizikidetza batzordea desegitea, Alardearen gatazka suspertzea eta espazio publikoan pankartak, kartelak edo pintadak areagotzeko “jarrera permisiboa” izatea jarri dituzte adibide gisa.
Azkenik, oraindik egin ez dituzten ekintzetan zentratu dira jeltzaleak, gaur gaurkoz udalak ez baitu Hondartza Kiroldegiaren kudeaketa udalak egitea, bidegorri sarea handitzea, aparkalekurako plan bat sortzea eta loretzaintza, garbiketa eta etxez etxeko laguntza zerbitzuak udaleratzea lortu.
EAJren ustez Abotsanitzek “beren aldaketa kontakizun propioa” sortu du, baina erabakiak “elkarrizketarik eta adostasunik gabe” hartzen ditu. Horren aurrean oposizio “arduratsu eta eraikitzailea” egiten jarraituko dutela adierazi dute.
