Bioterraren zaporea oliba olio ekologikoak bereizten du
Oliba olio ekologikoa da aurtengo produktu izarra eta haren bueltako hitzaldiak eta dastaketak egiten ari dira. Gaur ireki ditu ateak azokak eta igandera arte egongo dira 115 postuak.
Hogei eta bi urtek askotarako ematen dute. Bioterraren kasuan, azoka finkatzeko eta bezero askoren egutegian lekua egiteko balio izan dute bi hamarkadek eta hala adierazi du Maialen Gaztañaga Bioterrako zuzendariak. “Badaude bezero batzuk lehen orduan iristen direla erosketako orgatxoarekin eta urteroko postuetara joaten direla. Gainera, kasu batzuetan badakigu elkarrekin afaltzen dutela postukoek eta urteroko bezeroek”, adierazi du.
Guztira, 115 postu ikusteko aukera dago aurtengoan. Gaur ireki ditu ateak eta igandera bitartean egongo da zabalik. Ordutegiari dagokionez, gaur eta bihar 10:00etatik 20:00etara egongo da irekita, eta igandean, 10:00etatik 19:00etara. Doakoa da sarrera.
Oliba olio ekologikoa da aurtengo urrezko protagonista eta bederatzi postutan topa daiteke jatorri ezberdinetako olioak. Esate baterako, Euskal Herriko olioaz gain, Lleidakoa ere topa daiteke. Horiek guztiek dastaketa saioak eskainiko dituzte. Berritasunak ezagutzeko plaza ere bada Bioterra eta Casa Amellako kideek Aquafaba aurkeztu dute. Lekaleen uretik erauzitako produktua da eta arrautzaren zuringoa ordezkatzeko oso baliagarria da. Kataluniako Generalitateak saritu egin du etxe hau berrikuntza teknologiko eta agro elikadurari lotutakoagatik.
Lekaleekin jarraituz, Leondik iritsi dira Sembraoko kideak eta txitxirioa ahalik eta gehien probesteko asmoz sortutako produktuak ekarri dituzte. Nagusiki hummusak egiten dituzte eta gerturatzen denak probatzeko aukera izango du.
Hitzaldietan eta olio dastaketetan ere jendea bazebilen lehen orduetan. Horiek guztiak Bioterraren webgunean begira daitezke eta guztira 70 izango dira. Hurrengo egunetan jende gehiago gerturatzea espero dute antolatzaileek.
Merka2dasoa
Merka2dasoa bigarren eskuko bizikleten azoka egiten ari dira da. Txinzerrek antolatutako ekimena da eta Bioterraren egun guztietan egongo da zabalik. Helburua, berrerabilpena, mugikortasun iraunkorra eta ekonomia zirkularra sustatzea da, baita ere merkatuaren kudeaketa erraztea eta ekitaldiaren lehen egunetik erosleei aukera zabala bermatzea da xedea.
Aurrez aurreko erregistroa ahalko da egin Bioterran bertan; bizikletak eta erregistroa ere azokan ahalko da egin. Hiru baldintza ezarri dituzte azoka honetan parte hartzeko; soilik bizikletak onartuko dituzte; ez dute onartuko patinete elektrikorik edo osagarririk; eta gehieneko salmenta prezioa 500 eurokoa izango da.
