Euskaraoke herrikoia errealitate bihurtu da
Zortzi orduz euskaraz abesteko erronkari heldu zioten Hondarribiarrek, eta maisuki burutu zuten helburua. Maria Madalena plaza euskararen arnasgune bilakatu zen.

Euskaraoke herrikoia errealitate bihurtu zen iragan larunbatean. Zortzi orduz euskaraz abesteko erronkari heldu zioten Hondarribiarrek, eta maisuki burutu zuten helburua. Maria Madalena plaza euskararen bihotza bilakatu zen, euskararen arnasgune, eta “estres linguistikorik” gabeko espazio.
Blagan elkarteak prestatutako bazkari goxoaren ondoren, arratsaldeko 16:00etan eman zioten hasiera Euskaraoke herrikoiari. Oholtza gainera igo eta Euskaraldia antolatzen duela zazpi hilabete hasi zirela azaldu zuen Garoa Lekuona Euskara zinegotziak. Kontuan izanda Hondarribia “erdera nagusi duen udalerri euskalduna dela” zerbait ezberdina egin behar zutela argi izan zutela hasieratik kontatu zuen ondoren. “Badakigu ohiturak ez direla erraz aldatzen, baina argi genuen ere euskaraz ondo pasatzeko zerbait antolatu behar genuela”. Hala sortu zen Euskaraokea, eta larunbatean erronka errealitate bihurtu zen.
Aldi berean, Lekuonak eskerrak emateko baliatu zuen aukera: “Eskerrik asko egunero euskaraz hitz egiteko erabakia hartu duzuen guztiei, mila esker euskara ikastea erabaki duzutenei, Euskaraldi honetako euskara batzordeko kide guztiei, Euskaraldian izena eman duzuten guztiei, egun hau antolatzen ibili zareten guztiei, eta bereziki Blagan elkarteko kideei, Euskaraokean izena eman duzuten guztiei, eta ezin ahaztu gurekin dugun Gabi de la Maza. Argi dagoena da denok elkarrekin gauza ederrak egiteko gai garela”.
Euskaraldia hilaren 25ean bukatu zen, baina Lekuonak, udalaren konpromisoa irmoa dela gaineratu zuen eta euskararen alde lanean jarraituko dutela, “Hondarribiarrok euskara behar dugulako, eta euskarak gu behar gaituelako”. Hori dela eta, Euskaraldiak emandako “saretzearekin” aurrera jarraituko dutela esanez bukatu zuen.
Eszenatokiaren behekaldean gogotsu zeuden haurrak. Eztarriak berotzen eta gorputzak mugitzen aritu ziren, beren txanda helduko zain. LH5eko ikasleak izan ziren eszenatokia zapaltzen lehenak eta Zetak-en Errepidean abestia kantatu zuten ozen. Arratsaldeko 18:00ak arte aritu ziren ikastoletako haurrak kantuan eta dantzan, eta irakasleek mikrofonoak bere egin ondoren, herriko eragileei pasa zieten lekukoa.
Iluntzeko 21:00etatik aurrera gazteen txanda izan zen. Zenbait taldek koreografia eta guzti prestatu zuten. 00:00ak arte euskal kantak abesten eta dantzan aritu ziren, euskararen aldeko egitasmo herrikoia sekulako festa bilakatuz.











































