Gizon bat atxilotu dute mugikorrarekin Irungo kiroldegi bateko dutxetan biluzik zeuden hainbat gizon grabatzeagatik
Ertzaintzak beste lau biktimen salaketak jaso ditu eta ikerketak irekita jarraitzen du. Atxilotuaren etxean beste hainbat ebidentzia topatu dituzte hainbat gailu informatikoetan.
Atzo atxilotu zuen Ertzaintzak gizona. Aste honetako ostegunean (hilak 15) Ertzaintzak gizon bat atxilotu zuen Irungo kirol instalazio batean gizonen aldageletan telefono mugikor batekin biluzik zeuden gizonak grabatzeagatik. Sekretuak ezagutaraztearen eta agerraraztearen ustezko delitua leporatu diote eta Ertzaintzak atxilotutakoaren mugikorra ikertzen jarraitzen du. Guztira bost biktima daudela egiaztatu dute eta behin biktimak identifikatuta, salaketak jarri dituzte.
Atxilotua kiroldegian dutxatzen zebilen gizon batek identifikatu zuen, banaketa hormaren goiko aldetik norbait mugikor batekin grabatzen ari zitzaiola ohartu baitzen. Grabatzen ari zen gizona ohartu egin zen dutxatzen ari zenak ikusi egin zuela eta berehala alde egin zuela azaldu du Ertzaintzak. Biktimak ezin izan zuen grabatzen ari zena identifikatu.
Ertzaintzaren ikerketaren arabera, irundarra da grabaketak egitea egotzita atxilotu duten gizona. Haren telefono mugikorra aztertu ondoren, ertzainek ikusi zuten kiroldegi berean beste hainbat grabaketa eginak zituela eta guztien egitura berdina zela. Alegia, telefono mugikorraren kamera gizonak dutxatzen eta aldatzen ari ziren aldageletako banaketa hormen gainetik grabatzen zuela.
Atxilotutakoaren etxea miatu dute ertzainek eta bere hainbat gailu informatikoetan beste hainbat ebidentzia topatu dituzte. Ikerketak irekita jarraitzen du eta Ertzaintzak susmoa daukat biktima gehiago egon daitezkeela. 27 urte ditu atxilotu duten gizonak eta justiziaren eskuetan utzi dute.
