Asteburu erabakigarria 18 eta 16 urtez azpiko errugbi taldeentzat
Partida erabakigarriak jokatuko dituzte 18 eta 16 urtez azpiko taldeek, Baztanen eta Gernikan, hurrenez hurren.
Txingudi Errugbi taldeko gazte taldeek, hau da, 18 eta 16 urtez azpiko taldeek partida erabakigarriak jokatuko dituzte asteburu honetan. Plaiaundin arituko dira 16 urtetik beherako gaztetxoak eta Euskal Ligako hamahirugarren eta hamalaugarren postuak izango dituzte jokoan. Play off-aren joaneko partida izango da Gernikako zelaian 11:00etan. Gazteek azken partida galdu egin zuten Lekarozen, azken minutuetan ihes egin zien partidak eta larunbatean denboraldia ahalik eta hoberen bukatzea izango dute helburu.
Ordu berean, Baztanen egongo dira 18 urtez azpiko Gabiria Txingudi/Bera Bera/Baztan taldekoak eta Iruñea RC izango dute aurkari. Bidasokoak laugarren daude sailkapenean 19 punturekin eta iruindarrak puntu bateko distantzian daude, gainetik. Azkenaurreko jardunaldia izango da honakoa eta azken partida Elorrion jokatuko dute.
Igande Sasoi
Emakumezkoen kirola sustatzeko ekimenaren edizio berri bat egingo da Irungo Kolon pasealekuan igandean, hilak 18, eta Txingudi Rugby Taldeko kideak bertan izango dira. 10:30etatik aurrera, hiriko beste hainbat klubekin batera, errugbi elkarteak baloi obalatuaren kirola ezagutzera emango du bertan. Eskualdeko neska eta emakume guztiei gonbidapena luzatu nahi diete klubetik kirol jardunaldi apartaz gozatzeko.
