Abortu eskubiderako borroka Espainiako trantsizio garaian, Amaia KZn
'Las buenas compañias' pelikula proiektatuko dute ostiral honetan (hilak 16). Bi zuzendariak bertan izango dira, Bertha Gaztelumendi eta Nuria Casal
Emakumeen Etxea elkarteak eta Irungo Udalak proposatuta, Las buenas compañias pelikula proiektatuko dute Amaia KZn ostiral honetan (hilak 16) 18:30ean. Lanaren zuzendariak Nuria Casal eta Bertha Gaztelumendi irundarra dira eta bertan izango dira proiekzioaren ondoren solasean. Doakoa da sarrera.
Emanaldi hau Elkarrizketa Feministak programaren barruan antolatu dute eta aste honetako film laburrarekin Espainiako trantsizio garaian abortu eskubidearen alde borrokatu zuten emakumeak ezagutzea da helburua.
Beste jarduera batzuk
Irungo Emakumeen Etxea elkarrekin kudeatzeko hitzarmenaren esparruan ere eta Eskola Feministaren udaberriko programazioaren barruan, Mikel Otxotorenak maskulinitateei buruzko tailer bat eskainiko du, gizonei begirakoa.
Parte hartu nahi dutenek izena eman dezakete oraindik. Bi saiok osatuko dute: hilaren 27an eta ekainaren 3an izango dira, 17:30etik 20:30era, eta gizarteko berdintasunik ezari buruz hausnartzea eta, zehazki, gizonekin maskulinitateen eraikuntza soziala lantzea izango dute helburu, gizarte berdinzale eta ekitatiboagoa xede betiere.
