Belaunaldi aldaketarako prest dago Irungo Atsegiña
Zortzi buruhandi berri aurkeztuko dituzte hilaren 24an egingo duten "jai giroz betetako" ekitaldian. Buruhandi zaharren agurra ere izango da.
“Baietz oraingoan!” adierazi du Irungo Atseginñak. Izan ere, pasa den hileko 26an konpartsaren irudi berriaren aurkezpen ofiziala egin behar zuten baina euriak ez zuen etenik egin eta bertan behera utzi behar izan zuten aurkezpena. Baina dagoeneko iragar dezakete haien egun handiko data berria: hilaren 24a, ostirala. Herritar guztiei dei egin diete jai giro honetara gerturatzera.
Egun honetan eta eguraldia lagun bada, zortzi buruhandi berri aurkeztuko dituzte eta Irungo kaleetan barna ibiliko dira. Aurkezpen honek konpartsaren etapa berri bati hasiera emango dio. Buruhandi berri hauen historia 2017an hasi zen, orduan konpartsako erraldoiak zaharberritu zituztelako eta aurten aro hau bukatuko dute, sortu dituzten zortzi buruhandiak aurkeztuz.
Buruhandi berri hauek Eskuartean tailerrak egin ditu, festetako iruditerian espezializatuta dagoen lantegiak eta ikerketa sakona egin dute artxibo historikoak, argazki zaharrak eta bestelako iturriak kontsultatuz. Konpartsaren esanetan, funtzionaltasunari egokituta dagoen Irungo lehen buruhandien berrinterpretazio fidela lortu dute eta hiriaren iruditeria kolektiboan berriro eragingo dutela ziur da Irungo Atsegiña.
Jesus Rubio Irungo Atsegiñako presidentearen arabera, buruhandi hauek ez dira irudi berriak soilik: “Irungo festaren memoriaren aldeko apustu bat dira, tradizioari eta formaren zaintzari egindako aitortza. Ilusioz bizi dugu jende askok lehen aldiz ikusiko dituela eta hemendik aurrera hiriko bizitzaren parte izango direla”.
Eguneko egitaraua
Arbelaitz kalean Irungo Atsegiñak daukan egoitzatik irtengo dira konpartsako kideak 11:00etan. Lehenbizi buruhandi zaharrak izango dira protagonistak, azken aldiz zeharkatuko baitituzte Irungo kaleak. Agur hau “esker onez eta sinbolismoz” beteta egongo dela aurreratu dute.
San Juan plazara joango dira eta bertan, 11:30ak inguruan, ekitaldi publiko bat egingo dute eta omenaldiaren txanda izango da. Belaunaldi aldaketari lotutako keinu esanguratsuena izango da, bertan egingo baita buruhandi berrien aurkezpen ofiziala, musika zuzenean delarik eta giro berezia sortuko delarik. Merezi duen protagonismoa eman nahi diete zortzi izaki fantastiko hauei.
Irun Hiria Musika Bandak ekitaldiaren hasieratik bukaera arte lagunduko diete Irungo Atsegiñako kideei. Irungo Erraldoia 2025 saria Irungo Musika Bandak jaso zuen eta hargatik buruhandi berrien amabitxi ofiziala izango dira, urte luzeetan elkartearekin izandako lankidetza eta Irunen bizitza kulturalean duen konpromisoa aitortzeko.
San Juan plazako ekitaldia bukatuta, Parte Zaharreko kaleetan zehar ibiliko dira musikariak eta buruhandiak, giro herrikoan. Gogoratu dute herritar orok parte har dezakeela eta nabarmendu nahi izan dute bereziki umeekin eta adinekoekin figura hauekin “lotura estua” izan dutelako. “Maiatzaren 24a egun berezia izango da elkartearentzat”, adierazi du Jesus Rubio Irungo Atsegiñako presidenteak.
