Kultura esparruan indarkeriak prebenitzeko formazioa eskainiko du aldundiak
Formazioak eta bi protokolo zehatz lantzeko saioak egingo dira. Oiasso museoan izango dira hilaren 22an.
Gipuzkoako kultura eragileei begira eta indarkeria matxistak eta haurren kontrako indarkeria prebenitzeko tresnak eskaintzeko helburuz, Gipuzkoako Foru Aldundiaren Kultura departamentuak prestakuntza programa bat eta protokoloak egiteko programa bat eskainiko ditu. Hain zuzen, indarkeriaren oinarrizko kontzeptuak haurren eta generoaren eskubideen ikuspegitik izenburua jarri diote saioari. Irunen hilaren 22an izango da (osteguna) Oiasso museoan, 19:00etatik 21:00etara.
Goizane Alvarez Kulturako diputatuak “zeharkako ikuspegiaren garrantzia” nabarmendu du eta adierazi du Kultura departamentuak “zaindu, babestu eta eraldatzen duen kultura” bultzatu nahi duela. “Protokolo eta prestakuntza horiek askotan ikusezin geratzen diren indarkeriak identifikatzen laguntzen digute, baita horiei aurre egiteko tresnak sortzen ere errespetutik, berdintasunetik eta eskubideetatik” azaldu du Alvarezek. Gaineratu du espazio kulturalak “guztientzat benetan seguruak” izatea bermatzeko modu bat dela saio hau.
Prestakuntza hau presentziala da eta bi bloketan bereizita dago, horietako bakoitza ordu betekoa delarik. Lehenengo saioan, indarkeria matxistari jorratuko da, eta bigarrengoan haurren aurkako indarkeria. Saio bakoitzean gaiari dagokion aditu bat egongo da.
Prestakuntzez gain, bi protokolo espezifiko landuko dituzte aipatutako bi indarkeria horiei aurre egiteko. Batetik, indarkeria matxistaren aurkako protokoloa izango dute hizpide eta aplikazio eremuko emakume eta gizonekin egindako diagnostiko saioak, protokoloa aurkezteko aurrez aurreko bilerak eta bideo deien bidezko jarraipen telematikoa eskainiko dira.
Bestetik, haurren aurkako indarkeriaren aurkako protokoloa landuko dute. Saio honetan kulturaren sektoreko hainbat erakundetako arduradunekin egindako hasierako azterketa prozesu bat egingo dute, eta adingabeekin harremanetan dauden helduentzako jokabide kode bat garatuko dute. Protokolo saio hau aurrez aurre edota online jasotzeko aukera egongo da.
