PSE-EEk Hondarribia eremu tenkatu izendatzea eskatu du
Etxebizitzaren Euskal Behatokiak Euskadin tenkatuta dauden eremuei buruzko txostenean sartu du Hondarribia. Bertan sartzeko hiru irizpideetatik bi betetzen ditu.
Etxebizitzaren Euskal Behatokiak Euskadin tenkatuta dauden eremuei buruzko txostena argitaratu berri du. Hau da, alokairurako tenkatuta dauden eremu izenda daitezkeen udalerrien zerrenda jasotzen duen txostena.
Etxebizitzaren Euskal Behatokiak zerrenda horretan sartu du Hondarribia, bertan sartzeko hiru irizpideetatik bi betetzen baititu: alokairuaren prezioak gora egin izana azken bost urteetan eta salerosketaren prezioak gora egin izana azken bost urteetan.
Txostena erreparatu ondoren, Hondarribiko Alderdi Sozialistak hurrengo eskaera egin dio Hondarribiko Udalari: Hondarribia eremu tenkatu izendatzeko eskaera egin diezaiola Eusko Jaurlaritzari.
Eremu tenkatu izendapenak, besteak beste, honakoa ekarriko luke: kontratua bukatzen zaien errentariek urtean gehienez hiru luzapen eskuratu ahal izatea, eta azken 5 urteetan alokatu gabe egon diren etxebizitzen kontratu berrien alokairuaren prezioa mugatu ahal izatea, erreferentziazko prezioek markatuko duten mugarekin.
Aurrekariak
2023an egin zuen udalak Hondarribia eremu tenkatu izendatzeko lehen saiakera, baina Eusko Jaurlaritzak atzera bota zuen eskaera, tenkatutako bizitegi eremu izendatzeko baldintzak betetzen ez zituela iritzita.
Ordutik, egoerak berdin jarraitzen du sozialisten esanetan: “Alokairuaren batez besteko errenta 822 euro baino gehiagokoa izanik hilean; horrek esan nahi du prezioa %20 igo dela 5 urtean, eskaera handia izan dela Etxebiden”.
Etebizitzak lehentasuna izan behar duela uste du PSE-EEk, eta horren alde egiteko eskatu dio Abotsanitzi. “Oraindik ez dago etxebizitza babestuaren aldeko benetako apusturik, eta prezioek hamarkadak daramatzate gora egiten. Etxebizitza izateko eskubidea, unibertsala izan beharko lukeena, gutxi batzuek bakarrik onar dezaketen luxu bihurtu da ” esan dute.
Horregatik guztiagatik, eremu tenkatu izendatzeko bigarren saiakera egitea “premiazkoa” dela iritzi dute.
