Marta Oronozek eta Peru Txintxurretak diploma bat banatu diote udalari
Hondarribiko Udala 2022an atxikitu zen Pauso berriak programan. Hamabost urteko ibilbidea duen programa da, adimen desgaitasuna duten pertsonak gizarteratu eta laneratzeko helburuarekin.
Pauso berriak adimen desgaitasuna duten pertsonak gizarteratu eta laneratzeko programa da, Atzegi elkarteak eta Gureak enpresak sustatutakoa, Gipuzkoako Foru Aldundiaren laguntzarekin. Programa horren parte dira Marta Oronoz eta Peru Txintxurreta. Hondarribiko Udaleko langileak dira eta gaur goizean diploma bat eman diote udalari programa horretan izandako inplikazioagatik.
Pauso berriak ibilbide luzea duen programa da. Hamabost urte horietan guztietan, lan munduan “egiatan” txertatzeko aukera izan dute milaka pertsonek. Gizarte eta lan arloak garatzen dituzte eta beren gaitasunetara egokitutako lanak egiten dituzte.
Hondarribiko Udala 2022an atxikitu zen Pauso berriak programan. Peru Txintxurreta praktikak egiten hasi zen urte hartan, eta ordutik “lan asko egin” eta gizarte eta lan arloetan “gaitasun berriak” eskuratu dituela ziurtatu dute. Praktikak bukatutakoan udal langile gisa jarraitzeko aukera izan zuen, okupazio zerbitzuaren bidez.
Besteak beste, udaletxeko departamentu eta zerbitzuei dokumentazioa banatzea, kopiagailuak kargatzea eta dokumentazioa suntsitzea, eta liburutegian aldizkariak eta egunkariak antolatzea eta liburuak etiketatzea da bere egitekoa.
Marta Oronoz, berriz, 2023an hasi zen lanean. Talaia eskolaren eta Pauso berriak programaren arteko lankidetzari esker. Txintxurretak bezala “gauza asko” ikasteko aukera izan duela adierazi dute “Hauek dira Talaia Hondarribiko Eskolan dituen zereginetako batzuk: ateak ireki eta ixtea, eskutitzak jaso eta banatzea, jangelara joaten ez diren ikasleen zerrenda egitea, oinarrizko telefono arreta, birziklatze lanak…”.
