Nutrizio eta sukaldaritza tailerra, minbizia duten pazienteentzat
Minbiziaren tratamendu garaian elikadura osasungarriaz ikasteko aukera eskainiko du tailerrak, Plaiaundi Lanbide Heziketan. Hilaren 8an (osteguna) izango da eta aurretik izena eman behar da.
Tratamendu onkologikoan dauden pazienteen elikadura hobetzeko helburuz, nutrizio eta sukaldaritza tresna praktiko eta erabilgarriak eskaintzeko tailerra antolatu dute Plaiaundi Lanbide Heziketan. Saioa, minbizia pairatzen duten pazienteei begirakoa da eta OSI Donostialdeako nutrizionista Garbiñe Aizpurua eta Pello Amianak eskainiko dute. Gaztelaniaz izango da eta doan.
Paziente bakoitzaren fase eta beharretara egokituko dira osasun profesionalak. Gainera, tratamenduen albo ondorioei aurre egiteko gomendio erabilgarriak ere emango dituzte Aizpurua eta Amianak. Ondoren, Donostiako Cebanc Ostalaritza eta Sukaldaritza eskolarekin batera, sukaldaritza saio praktiko bat egingo dute, errezeta osasungarriak ardatz.
Hilaren 8an (osteguna) izango da tailer hau, Plaiaundi Lanbide Heziketan bertan eta 10:30ean hasiko dira. Onkologia 360 gradu proiektuaren parte da proiektu hau eta izen ematea doakoa da. Eusko Jaurlaritzako Lanbide Heziketako Sailburuordetzak bultzatutako berrikuntza proiektu bat da honakoa, eta Gipuzkoako hainbat Lanbide Heziketako ikastetxeekin ari dira elkarlanean: Monte Albertia, Tolosa Inmakulada eta ESCIVI.
Plaza mugatuak dira, eta izena eman behar da formulario hau beteta.
