Gazteak On lehiaketan, herritarren txanda iritsi da
Elikadura jasangarria hizpide, bideo lehiaketan hartu dute parte Txingudiko 100 ikasle baino gehiagok. Herritarren saria erabakitzeko txanda da oraingoa.
Elikadura jasangarriaren bueltan hausnartzeko ekimenez, Gazteak On bideo lehiaketa jarri dute martxan lehen aldiz Labore Txingudi, Maia permakultura eta Hendaia Koopek. Urtarriletik apirilera luzatu den lehiaketa izan da eta Irun, Hondarribia eta Hendaiako DBHko eta kolegioko ikasleei begirakoa izan da, gazteei “protagonismoa” eta “sormena” lehenesteko xedearekin.
Fase erabakigarrian sartu da lehiaketa. Orain, herritarrek bideo irabazlea bozka dezakete eta horretarako lotura honetara sartu behar da. Pertsona bakoitzak behin bozka dezake eta hiru bideori eman ahal dio botoa. Herritarren Saria izango da bozketa honen bidez banatuko dena eta epaimahai espezializatu bat ere egongo da saria nori eman baloratzen.
Orotara, 100 ikasle baino gehiago inplikatu dira eta guztira hamasei taldek eman dute izena Gazteak On lehiaketan eta horietatik hamalauk hartu dute parte. Talde gehienek osasunaren ikuspegitik landu dute elikaduraren jasangarritasuna eta menu kontzeptua sarritan ageri dela azaldu dute antolatzaileek.
Bi taldek zailtasun batzuk medio, ezin izan zuten esperientzia honetan aurrera jarraitu. Zehazki, Hondarribia eta Hendaiako eskolek eduki dituzte parte hartzeko logistika zailtasunak baina antolatzaileak konprometitu dira hurrengo urtean badiako kostaldeko bi herri hauetako ikasleak lehiaketaren parte izateko lanean jarraitzera.
Dena den, ikastetxeak ere saritu nahi dituzte eta parte hartu duten ikastetxe guztiek bideoak zabaltzeko material kit bat jasoko dute. Kit horretan sare sozialetarako irudiak, QR kodeak, kartelak eta mezu proposamenak topatuko dituzte, hainbat euskarri eta plataformatan promozioa egin ahal izateko.
Sari banaketa ekainaren 6an egingo da Ficoban, Bioterra azokaren barruan. Ekitaldiak ordubete iraungo du eta aurkeztutako hamalau lanak ikusteko aukera egongo da.
