Irungo Alarde Publikoko Junta: "Uste dugu hiriak merezi duela udalak antolatutako alardea"
Alarde publiko eta bakarraren aldeko aldarria egin dute berriz ere desfile parekidearen buruek. Alkateari eskaera bidali diote.
Irungo Alarde Publikoko Juntak eskaera zuzena bidali dio Irungo alkate Cristina Labordari: “Uste dugu tenore honetan gure hiriak merezi duela berriro udalak antolatutako Alardea”. Hau da, alarde publiko eta bakarra antola dezala egin diote desfile parekideko kideek udal agintariari. Juntakideek oroitarazi dute 1998tik bi Alarde dituela hiriak ekainaren 30ean, eta “herritar guztiontzako Alarde bat” antola dezala galdegin diote herriko etxeari.
Herritar orori zabalik den Alardeko kideek adierazi dute Alardea “mendeetan eta mendeetan” antolatu duela udala; “Areago, udal ez, baina kontzeju huts zelarik ere antolatzen zuen, eta XIX. mendearen bigarren erdialdeaz geroztik eutsi dio gaur egun ezagutzen dugun erari. Emakumeen eta gizonen arteko berdintasun printzipioa, bai eta sexuagatik ezein bazterkeriaren debeku berariazkoa ere, gure toki erakundea barne den ordenamendu juridiko guztietan jasota daude”.
Halaber, mahai gainera ekarri dute Euskal Herriko Autonomia Estatutuan ere jasota dagoela benetako berdintasun eraginkorra ziurtatu behar diela biztanleei: “Emakumeen eta gizonen arteko berdintasuna betebehar moral eta politikoa da, emakumeen eskubideak bermatzea dakarrena, bai eta pertsona guztientzako aukera berak eraikitzea ere. Beraz, zuzenean dei egiten die arduradun politikoei, nolako jokabidea duten benetako berdintasuna ezinezko bihurtzen duten oztopoez esparru guztietan, jai girokoetan barne, desager dadin”.
Emakundek esandakoak ere baliatu dituzte alarde publiko eta bakarra aldarrikatzeko: “Emakundek dioen bezala, berdintasuna elkarbizitza balio bat da, eta urteotan jendarte osoak, baita udal erakundeak berak ere, urratsak egin ditu aurrerantz berdintasunaren aldeko konpromisoan hainbat esparrutan”. Konpromiso hori Irungo festetako ekitaldirik nagusienera ere eraman dezala eskatu diote Irungo Udalari.
