Gaztetxeen eta asanbladen arteko elkartasun jaialdia
Moskuko gaztetxea okupatzeagatik 3.000 euroko isunak jaso dituzte bi auzipetuk. BIGLAk eta Lakaxita gaztetxeak, bihar, elkartasun jaialdia egingo dute «gaztetxeen kontrako ofentsibaren» garaian.
Iazko abenduan lokal bat okupatu zuen Bidasoko Gazte Langileon Asanbladak (BIGLA) Eguzkitzaldea kalean, eta Moskuko gaztetxea jaio zela iragarri zuten. Aurrekariak dituen okupazioa izan da, eskualdeko gazte horiek eta beste batzuek Hondarribian Egiluz gaztetxea okupatu baitzuten 2019an. Gerora, iaz, beste okupazio saiakera bat egin zuten, hura «gaizki» atera zela azaldu du BIGLAk. Bost urte darama asanblada horrek espazio baten bila, eta urte hauetan horren «hutsunea» nabaria izan dela azaldu dute. «Gazteen artean saretzeko eta antolakuntzari bide emateko espazio falta daukagu, aisialdi kontsumistatik urrun».
Bestalde, Hondarribiko San Telmo gazteluaren lorategietan kanpaldia egin zuten ere joan den udaran, eta ondorioz, espazio bat lortzeko udalarekin «negoziazio prozesuari» ekin zioten. Fruituak eman zituen eta gazteei espazio baten proposamena egina die Hondarribiko Udalak. BIGLAren esanetan, lokal horrek ez ditu asanbladaren beharrak «aseko», baina aitortu dute «azpiegitura baten beharra» dutela, eta proposamenari baiezkoa eman diotela. Aurten Hondarribiko Udalak espazioa zein izango den jakinaraztea adostu zuten, baina «bermerik» ez dutenez, Irunen gaztetxea okupatzeko pausua eman zuten joan den abenduan.
Moskuko gaztetxean hilabete izan zen BIGLA, eta okupatu bezain pronto lokalaren jabeei jakinarazi zieten gaztetxean haien proiektua egikaritzen hasi zirela. Berria jasota, jabeek Ertzaintzari deitu zioten. Elkarrizketarako «borondate falta» salatu dute BIGLAko kideek: «Erabaki zuten indarrez erantzutea guk egindakoari, eta argi utzi ziguten gu kanpoan nahi gintuztela. Horregatik, poliziak epaiketa azkarraren prozedura ireki zuen». Epaiketa hura, prokuradore falta medio, bertan behera utzi behar izan zuten eta urtarrilera atzeratu zuten.
Epaiketa
Asanbladako bi kide izan dira inputatuak gaztetxea okupatzeagatik, eta iragan urtarrilean eseri ziren epailearen aurrean. Bertan jakinarazi zieten lokala «salgai» dagoela, etxe agentzia baten bitartez, eta hori froga zezaketela kontratu baten bidez ere adierazi zieten. BIGLAk ez du «oso sinesgarritzat» jo kontratu hori. «Eguneroko erabilera ematen ziotela jabeek azaldu zuen haien abokatuak ere, baina guk badakigu 15 urte baino gehiago daramala inolako erabilpenik gabe. Balizko salmenta kontratua, beraz, ez da oso sinesgarria». Sinetsi ala ez, kontratua egonez gero, 120.000 euroko isuna jaso zezaketen gazteek, baldin eta lokala husten ez bazen. «Isun handi hau auzipetu dituzten bi kideengan eroriko zen, eta ez genion arrisku horri aurre egin nahi. Albo batera egin genuen», gogorarazi dute.
Elkartasun jaialdia
Lokala hustu zuten, baina horrekin ez ziren epaiketaren ondorioak bukatu. Dagoeneko hainbat isun jaso dituzte «bata bestearen atzetik», 3.000 euroraino iritsi da haien batuketa. Dena den, «borrokan jarraitzeko» asmoa adierazi du asanbladak, «aisialdi kontsumistatik kanpo; hezkuntza politikorako espazio bat lortu arte». Argi adierazi dute «aurre egingo» diotela zigor ekonomiko horiei. Horregatik, isunei aurre egiteko elkartasun jaialdi bat antolatu dute biharko Lakaxita gaztetxean, bertako asanbladarekin batera. Kamisetak ere egin dituzte.
Arratsaldetik goizeko ordu txikiak arteko egitaraua da biharko ondu dutena, eta Lakaxitaren ildoari jarraiki, genero arrakalari aurre egitea asmo duen programazioa antolatu dute. Horrez gain, eskualdeko eta inguruko artistek joko dute jaialdian.
Lehenbizi, «gaztetxeen kontrako ofentsiba» hizpide duen hitzaldia eskainiko du BIGLAko kide batek, 19:00etan. «Gaztetxeak ofentsiba bat sufritzen ari dira. Horren barruan dago gure egungo egoera eta pixka bat azalduko dugu zein testuinguru duen honek; nola ematen ari den ofentsiba hau, eta nola ari den gauzatzen etxebizitzaren garestitzea». Merienda eskainiko dute segidan, eta ondoren, 20:00etatik aurrera, musika eta show-ak izango dira nagusi. Bi asanbladen arteko elkarlana, «positiboki» baloratu dute, eta «gaztetxeen kontrako ofentsibari» aurre egiteko balio izan duela uste dute. «Gaztetxeen aldeko borroka elikatzen jarraituko dugu». ■
