Adur Errazkin, Kaiet Arruabarrena, Aitzol Iraola eta Maia Sanchez Gipuzkoako Eskolarteko txapeldun
Iragan igandean 500 atleta gazte baino gehiago bildu ziren Plaiaundiko pistan. Gipuzkoako Eskolarteko Atletismo Txapelketa jokatu zen bertan.
Igandean 500 atleta baino gehiago bildu ziren Plaiaundin. Iragan igandean Gipuzkoako Eskolarteko Atletismo Txapelketa jokatu zen Plaiaundiko pistan. Guztira Gipuzkoa osoko 500 atleta gazte baino gehiago bildu ziren parke naturalean, euren onena emateko prest. Parte hartzea, beraz, handia izan zen, eta harmailetan giro ezin hobea izan zutela adierazi du Bidasoa Atletiko Klubak.
Bidasoko atletei dagokienez, haur-kategorian emaitza onak eskuratu zituzten. Adur Errazkinek eta Zhu Yuxuanek urrezko zein zilarrezko dominak eskuratu zituzten altuera jauzian. Biek ala bidek altuera bera gaindituta: 1,57 metro.
Abiaduran, Nora Gonzalezek hirugarren postua lortu zuen 80 metro hesietan 12,87 segundorekin. 500 metroko proban aldiz, Kaiet Arruabarrenak garaipena lortu zuen 1:21,50eko denborarekin. Lasterketa berdinean Adur Errazkinek haren eguneko bigarren domina eskuratu zuen. Kasu honetan brontzezkoa, 1:22,50eko denborarekin.
Disko jaurtiketan Eider Eizagirrek brontzezko domina eskuratu zuen. Diskoak 800 gramo pisatzen zituen, eta hura 20,75 metrora jaurtitzea lortu zuen.
Kimuen kategorian, Aitzol Iraola nabarmendu zen. Pilota jaurtiketan 30,55 metroko marka lortu zuen, eta hari esker urrezko domina eraman zuen etxera. Luzera jauzian aldiz, Amets Gurutzaldek brontzezko domina lortu zuen 4,09ko salto bati esker.
Eta abiadura probetan hurrengo emaitzak lortu zituzten: Iraia Garciak zilarra eskuratu zuen 60 metro hesien proban 10,28 segundoko denborarekin. 500 metro lisoetan Maia Sanchezek urrezko domina eskuratu zuen. Metro horiek 1:31,33ko denboran burutu zituen. Azkenik, 1000 metroko proban Noa Lekuonak hirugarren kokatzea lortu zuen, 3:46,61ko denborarekin.
