Bidasoko irakasleak greban, hainbat aldarri soinean
Pasa den astetik ez dira Hezkuntza Sailarekin bildu eta bihar ere greba egingo dute. Irunen grebak %60ko jarraipena izan du; Hondarribian, berriz, %34. Bihar elkarretaratzera dei egin dute, Irunen.
Dunboa ikastetxea Gaurko eta biharko grebara deituta daude hezkuntza publikoko irakasleak. Bizkai, Araba eta Gipuzkoa artean 27.000 dira, horietatik asko Irun eta Hondarribiko ikastetxeetan dabiltzanak. Deialdiei dagokienez, gaur Donostian egingo den manifestaziora joateko deia egiteaz gain, San Juan plazan berriro elkartuko dira bihar Bidasoko irakasleak, 11:00etan.
Joan den astean Jaurlaritzako Hezkuntza Sailaren eta sindikatuen arteko negoziazioek porrot egin zuten; handik aurrera ere ez dira bildu, eta Hezkuntza Sailak ez duela proposamen berririk egin. Beraz, Steilas, LAB, ELA eta CCOO sindikatuek indarrean mantendu dituzte aste honetarako bi mobilizazio egunak (joan den astean hiru egin zituzten).
Besteak beste, hitzarmena berritzea eskatzen dute, 2010etik berritu ez dena. Horrez gain, hezkuntza publikoko langileen lan baldintzak hobetzea eskatuko dute irakasleek.
Eskualdeko zentroen atarietan elkarretaratzeak egiten dira goizean zehar; Gasteizen, Jaurlaritzaren egoitzaren atarian, kanpaldia egiten ari dira irakasleak. Eskualdeko irakasle, zuzendaritza eta sindikatuek gaurko mobilizazioen irudiak balituzte, lasai asko bidali ditzakete HITZAra posta elektroniko bidez, edo Whatsapp nahiz Telegram bitartez (678 687 125).
Grebaren jarraipen datuak
Irungo 11 ikastetxeetako datuak lortzeko lanean ari da HITZA, eta orain arteko datuak dira jarraian publikatutakoak. Datu orokorren arabera, Irungo ikastetxeetan ia %60ko jarraipena izan du grebak. Hondarribian, berriz, irakasleen %34k egin du greba.
Dena den, datu horietan zenbatek egin duten greba jaso da ehunekotan, eta gainontzekoak greba egin ez dutenak lirateke. Zenbatzeko modu honetan “tranpa” dagoela salatu dute Irungo irakasleek, zaku berean sartu baitituzte greba ez egitea erabaki dutenak eta gutxieneko zerbitzua betetzera derrigortu dituztenak. Halaber, bajan dauden langileak greba ez egin gisan zenbatzen ditu Hezkuntza Sailak ,eta horren kexu ere izan dira. Zenbatzeko modua aldatzeko eskaera egin dute.
Hondarribia:
- Talaia ikastetxea: %34
Irun:
- Belaskoenea: –
- Dunboa: %70
- Eguzkitza LH: –
- Eguzkitza BHI: %62
- Elatzeta: %75
- Hirubide: –
- Leka Enea: %65
- Toki Alai HH LH: %57
- Toki Alai BHI: –
- Txingudi HH LH: %73
- Txingudi BHI: %75
- Pio Baroja institutua: %54
- Bidasoa Lanbide Heziketa: %20
- Plaiaundi Lanbide Heziketa: %38
