Irun eta Hondarribiko EAJ "pozik", mugikortasun planagatik
Zazpi jarduketak "lehenbailehen" egiteko erakundeekin elkarlanean jarraituko dutela adierazi dute. Trafikoarentzat "mugarri" den plana dela uste dute.
Irun eta Hondarribiko EAJk adierazi dute “pozik” daudela bi herrietarako Gipuzkoako Foru Aldundian diseinatu duten mugikortasun planagatik. Plan honetan ageri diren zazpi esku-hartzeak “askotan” defendatu dituztela gogoratu dute eta egikarituko badira, aldundiaren konpromisoagatik izango dela azaldu dute.
Gaur martxoko Irungo Udaleko Osoko Bilkura egin da eta bertan hego ingurabidea bukatzeko Plan Orokorraren aldaketa onartu dute. Urrats hau “garrantzitsua” dela Irunentzat uste dute jeltzaleek eta ingurabide honen bukatzea Irungo udal gobernuaren akordioan jasotako proiektu “estrategikoetako bat” dela adierazi dute.
Erakundeekin elkarlanean jarraituko dutela berretsi dute, zazpi proiektu hauek “lehenbailehen” egiteko. Ibilgailuen trafikoarentzat “mugarri” izango dela ziur agertu da EAJ.
Hondarribiko jarduketei begira jarrita, “funtsezkoak” izango dira hiriaren irteerako eta sarrerako sarbideak eta zirkulazioa hobetuko dituztelako. N-638 eta GI-636 errepideak elkartuko dituzte bi biribilguneekin baina nabarmendu nahi izan dutena da proiektu honek “etorkizuneko ikuspegi argia duen inbertsioa” dakarrela. Izan ere, Zubieta inguruan EAJk Campus Teknologikoa eraiki nahi du eta horren sarbideetan pentsatuta diseinatu dituzte bi biribilgune horiek.
Bestalde, Mendelu-Eskapatxulo eta Zubimuxu arteko lotura hobetzeko proposamena izan dute hizpide. Oraingoz, Zubimuxun lotura oso bat sortzea aztertzen ari dira eta bidegorri, espaloi eta egonleku berriak egitea da proposamena. Amuteko plana ere izan dute hizketagai eta bizikleten eta oinezkoen errei bat jarriko dela biribilgune berria sortzearekin batera aurreratu dute. Asmoa, mugikortasun “seguruagoa” eta “iraunkorragoa” izatea da.
Azkenik, proiektu batzuek “konplexutasuna” ezagutzen dutela esan dute jeltzaleek baina “egunez egun” lanean jarraitzeko asmoa adierazi dute, alderdi bakoitza dagoen posiziotik, lan horiek “errealitate” izan arte.
