Imanol Gil atleta seigarren, Nazioarteko Master Txapelketan
200 metroetan finalera iristea lortu du irundarrak eta seigarren bukatu zuen. Aldiz, 60 metroetan brontzezkoarekin itzuli da.
Floridan (Ameriketako Estatu Batuak) izan da Imanol Gil BATeko atleta irundarra Nazioarteko Master Txapelketan (World Masters Athletics Indoor) eta 200 metro lisoetan aritu da lehian M35 kategorian. Sailkapenean seigarren postuan bukatu zuen, hainbat egunetan lehiatzen aritu ondoren. Bestalde, brontzezkoa jantzi du 60 metroetan.
Lehen aldiz 200 metroetan lasterka egin zuela, bere seriearen irabazle izan zen 23,52 segundotan. Hartara, kanporaketak pasa zituen eta finalerdietara iritsi zen, 60 metroetan brontzezkoa jantzi eta 24 ordutara.
Finalerdietan pausu berri bat eman zuen 22,94 segundorekin eta hau txapelketa honetan Gilek egin zuen marka hoberena izan zen. Emaitza honekin bigarren sailkatu zen bere seriean eta finalerako txartela eskuratu zuen. Mugarria izan da finalera sailkatze hau hainbat egunetan lehiatzen egon ondoren nekatuta baitzegoen irundarra.
Finalean indar askorekin lehiatu zen Gil eta lehen metroetatik erasotzen aritu zen. Dena den, aurreko lasterketetako nekea etsai izan zuen eta lasterketan atzean gelditzen hasi zen. Hala, seigarren bukatu zuen 23,31 segundorekin.
Nazioarteko Master Txapelketatik brontzezko domina batekin itzuli da, 60 metrotako lasterketan lortutakoa. Halaber, finalista postuaren esperientzia berarekin darama, 200 metrotan. BATek zorion zintzoenak opa dizkio.
