Erasmus+ programara batu da Txingudi Ikastola
Ingelesa edo frantsesa, zein lehenetsi hauta dezakete Txingudin. Aurten, lehen aldiz, Erasmus+ programarekin Estonian izan dira batzuk, eta Bretainiara joango dira besteak.
Atzerriko hizkuntza ikasgaiaren barruan zein ikasi hauta ezina zen orain dela hiru urte arte Txingudi ikastolan, eta ingelesa ikasten zuten ikasle guztiek. Ikastetxeko klaustroan atzerriko zein hizkuntza ikasi aukeratu ahal izatearen alde egitea erabaki zuten 2022an, eta orain, frantsesa ere ikas dezakete atzerriko lehen hizkuntza gisa bertako ikasleek. Ingelesa ere ikasten dute frantsesa hautatzen dutenek, baina frantsesa lehen atzerriko hizkuntza dutenek astean hiru ordu eskaintzen dizkiote horri, eta astean bi ordu ingelesari.
Maitane Cardo Txingudi Ikastolako frantseseko irakasleak azaldu du Hondarribiko Talaia eskola izan dutela erreferente frantsesa ere ikasgai nagusitzat proposatzeko garaian. «Hondarribiko Talaia eskolan ikasleek aukera hori dute, eta Bidasoan frantsesa ere entzuten denez, hori jakitea garrantzitsua dela uste dut», azaldu du.
Orain arte, frantsesa atzerriko lehen hizkuntza moduan hautatzeko aukera izan dute DBHko lehenengo mailatik hirugarren maila bitarteko ikasleek, duela hiru urte eman zitzaielako aukera hau lehenbizikoz. Egun laugarren mailan daudenek tailer gisa ikasten dute frantsesa, baina hurrengo ikasturtean lau mailetan egongo dira frantsesa lehen atzerriko hizkuntza gisa ikasten arituko direnak.
Erasmus+
Ikasturte honetan beste pausu bat eman dute irakasleek, bai ingelesa zein frantsesa praktikatuz ikasi ahal izateko helburuarekin: Txingudik Erasmus+ programarekin bat egin du. Elkartrukea egiteko aukera eskaintzen du programak, eta laugarren mailako ikasleei zuzendutakoa da. Ingeleseko ikasleak Estoniako hiriburu Tallinetik itzuli berri dira, eta frantsesekoak Bretainiara joango dira maiatzean. Bertako familia batean astebeteko egonaldia da programak eskaintzen duena, eta ikasleen gurasoek ez dute ezer ordaindu beharko. Gero, atzerriko ikasleak Euskal Herrira etorriko dira eta haien etxeetan jasoko dituzte Txingudikoek.
Gainera, Erasmus+ programaren aurrekari gisa, bigarren DBHko ikasleak Bordelera joan dira aste honetan, hiru eguneko irteera egitera. Hirugarren mailakoak, berriz, Parisera joango dira hiru egun igarotzera. Cardo irakaslearen esanetan, egonaldi horren asmoa «ahal duten guztia ikastea» da. «Hainbat gauza eginez ematen du lortzen ari garela ikasle kopuru polit batek frantsesa ikastea, eta ikasteko motibazioa izatea», gaineratu du.
Ikasleak atzerrian
Binta Rodriguez eta Jon Casado laugarren mailako ikasleak dira. Haiek Erasmus+ programarekin bat egin duten lehenbiziko ikasle taldekoak dira. Estoniatik itzuli berri dira biak, eta ingelesa praktikatzeko probestu dute bidaia. «Hasieran ingelesez hitz egiteko beldurrarekin nintzen, baina gero konfiantza hartu nuen eta ondo ibili naiz. Ingeles asko hitz egin dugu, eta nik uste asko aurreratu dugula. Askatasun handiagoarekin hitz egiten dugu orain», adierazi du Rodriguezek.
Programarekin zergatik bat egin duten galdetuta, Rodriguezek dio asko gustatzen zaiola bidaiatzea eta horregatik bat egin zuela horrekin. Hasiera batean frantseseko elkartrukean izena ematea pentsatu zuen, baina Estonia Bretainia baino urrunago egonda, erabakia aldatu zuen. Casado ere bide beretik joan da; «kanpora joango zirela jakitean ez nion kasurik egin ezer gehiagori», esan du. Lagunei ere esan zien izena emateko, baina haiek ez ziren animatu, eta bakarrik joatea erabaki zuen. «Ideia ona izan da bakarrik joatea, eta familiarekin eta beste batzuekin egotea izan da garrantzitsuena». Rodriguezen esanetan, «pena askorekin» itzuli dira.
Bestalde, Malen Garcia, Haizea Goikoetxea eta Añez Iribarren Bretainiara joango dira frantsesa praktikatzera, baina aste honetan harrera familia izan dira, bretoiak Irunen izan baitira. «Hasiera oso arraroa izan da, baina gero ohitu gara», esan du Goikoetxeak. Elkartrukerako proposamena «harriduraz» jaso zuen Iribarrenek, eta Garciak gaineratu du argi ikusi zuela aukera hau aprobetxatu egin behar zela. «Frantsesa praktikatzeaz gain, gure arteko harremanak gehiago lotzen ari dira», esan du Garciak.
Erasmus+ programarekin ez dira etxean gelditzen eta egunero planak egiten dituzte. Goikoetxeak nabarmendu du denbora gehiago igarotzen dutela kanpoan etxean baino. Izan ere, etxean «ahalik eta denbora gutxien» egoten saiatzen direla azaldu du Garciak eta Euskal Herria ahalik eta gehien erakusten ahalegintzen dira ere. Gainera, ingeleseko ikasle Casadok aitortu du berak ere Euskal Herria ezagutzeko probestuko duela estoniarren bisita: «nik ere badaukat zer ikasi; ez naiz inoiz egon Zumaiako Flyschean eta nire familiarekin hara joango gara. Gogo asko ditut».
Dibulgazioan arituko direla ere argi du Rodriguezek eta gogoratu du Estoniako bere familiak ez zuela Euskal Herria ezagutzen. «Ez zekiten ezta existitzen zenik eta Euskal Herriari buruz hitz egin nien eta ikasi zuten. Haiek ere beste toki berri bat ezagutzeko gogoa daukatela esango nuke». Harrera familia izateko gogoz daude Casado eta Rodriguez eta han «oso ondo» tratatu dieten gisan, hemen ere tratu berdina emango diotela bukatu dute.
